Астана. 3 маусым. ИНТЕРФАКС-ҚАЗАҚСТАН – Кипр Президенті Никос Христодулидис сәрсенбі күні Қазақстанға ресми сапармен келді. Бұл туралы Қазақстан Президентінің баспасөз қызметі хабарлады.
Қазақстан Президенті Қасым-Жомарт Тоқаевпен шағын құрамда өткен келіссөздер барысында Кипр басшысы Қазақстанға екі ел арасындағы алғашқы тікелей әуе рейсімен келгенін атап өтті.
«Өкілді бизнес-делегациямен бірге Кипрден Қазақстанға алғашқы тікелей рейспен келгеніме өте қуаныштымын», – деді Никос Христодулидис келіссөз барысында.
Кипр Президентінің айтуынша, екі ел арасында ынтымақтастықты кеңейту үшін айтарлықтай әлеует бар.
«Бүгінгі келіссөздер екіжақты ынтымақтастықты одан әрі дамытуға ықпал етеді деп сенемін. Сонымен қатар мен Қазақстанға басқа бір мәртебеде де келіп отырмын. Қазіргі уақытта менің елім Еуропалық Одақ Кеңесіне төрағалық етуде. Осы өңірдің, әсіресе Қазақстанның маңыздылығын ескере отырып, Еуропалық Одақ пен Қазақстан арасындағы өзара іс-қимылды одан әрі дамыту жолдарын талқылауға дайынмын», – деді Кипр Президенті.
Өз кезегінде Қасым-Жомарт Тоқаев Қазақстан мен Кипр серіктестікті дамыту бағытында елеулі нәтижелерге қол жеткізгенін айтты.
«Біз мемлекеттеріміздің астаналарында елшіліктер аштық. Екі ел арасында тікелей әуе қатынасы іске қосылды және басқа да маңызды бастамалар жүзеге асырылды. Сонымен қатар екіжақты ықпалдастықты одан әрі кеңейту үшін зор әлеует бар деп санаймын. Өз тарапымнан ынтымақтастығымызды түрлі бағыттар бойынша дамыту үшін бар күш-жігерімді салуға дайынмын», – деді Қазақстан Президенті.
