Мәскеу. 16 маусым. ИНТЕРФАКС – Goldman Sachs сарапшылары АҚШ пен Иран арасындағы қақтығысты реттеу процесін бастау жөніндегі меморандумға қол қойылғаны туралы жаңалықтардан кейін 2026 жылға арналған Brent маркалы мұнайдың орташа бағасы бойынша болжамын бір баррель үшін 90 доллардан 85 долларға дейін төмендетті. Бұл туралы The Wall Street Journal басылымы банк есебіне сілтеме жасап хабарлады.
Ал Morgan Stanley сарапшылары төртінші тоқсанға арналған Dated Brent (даталанған Brent) эталондық мұнайының бағасы жөніндегі болжамын бір баррель үшін 100 доллардан 90 долларға дейін төмендеткен.
Бұған дейін бұқаралық ақпарат құралдары АҚШ президенті Дональд Трамп пен Иран парламентінің төрағасы Мұхаммед-Бакир Ғалибаф Таяу Шығыстағы дағдарысты реттеу жөніндегі меморандумға электронды форматта қол қойғанын хабарлаған болатын. Құжатқа ресми қол қою рәсімі 19 маусымда өтеді деп күтілуде.
Сонымен қатар Дональд Трамп Франция президенті Эммануэль Макронмен келіссөздерден кейін Ормуз бұғазының ішінара ашылғанын және жұма күні толық ашылатынын мәлімдеді.
Morgan Stanley сарапшылары Таяу Шығыста мұнай өндіру көлемін қалпына келтіру шілде айының ортасында басталады деп болжайды. Олардың бағалауынша, қақтығыс кезінде жоғалған өндіріс көлемінің 50 пайызы қыркүйекке қарай, ал 80 пайызы желтоқсанға дейін қалпына келеді.
Ал Goldman Sachs сарапшылары Парсы шығанағы елдерінің мұнай экспорты шілде айының соңына қарай соғысқа дейінгі деңгейге қайта оралуы мүмкін деп есептейді. Бұл олардың бұрынғы болжамынан бір айға ертерек мерзім.
