Астана. 17 маусым. ИНТЕРФАКС-ҚАЗАҚСТАН – Парламент Мәжілісі сәрсенбі күні өткен жалпы отырыста «2010 жылғы 10 желтоқсандағы Ұжымдық қауіпсіздік туралы шарт ұйымының ұжымдық қауіпсіздік жүйесіне кіретін күштер мен құралдар құрамаларының мәртебесі туралы келісімге өзгерістер енгізу жөніндегі хаттаманы ратификациялау туралы» заңды қабылдады.
Мәжілістің қорытындысында атап өтілгендей, хаттаманың негізгі мақсаты – ұжымдық қауіпсіздік күштері мен құралдары құрамаларының тарап мемлекеттердің аумағында уақытша болуына қатысты құқықтық негіздерді жетілдіру.
Енгізіліп отырған өзгерістер нақтылаушы және толықтырушы сипатқа ие. Олар келісім нормаларын қатысушы мемлекеттердің ұлттық заңнамаларымен және ҰҚШҰ-ның нормативтік құқықтық құжаттарының ережелерімен үйлестіруге бағытталған.
Сонымен қатар Мәжіліс «2015 жылғы 15 қыркүйектегі Ұжымдық қауіпсіздік туралы шарт ұйымына мүше мемлекеттердің әскери және өзге де құрамаларды, олардың жылжымалы мүлкін, сондай-ақ әскери мақсаттағы өнімдерді тасымалдау саласындағы ынтымақтастығы туралы келісімге өзгерістер енгізу жөніндегі хаттаманы ратификациялау туралы» ілеспе заңды да қабылдады.
Құжаттың мақсаты – ұжымдық қауіпсіздік жүйесінің күштері мен құралдарын өз міндеттерін орындау кезінде немесе бірлескен оқу-жаттығуларға қатысу барысында тасымалдауды құқықтық тұрғыдан реттеу тетіктерін жетілдіру.
Түзетулер әскери және өзге де құрамаларды тасымалдауды ұйымдастыру мен жүзеге асыру кезінде жеделдікті арттыруға бағытталған. Әсіресе шұғыл шаралар қабылдау қажет болған жағдайда келісім нормаларын нақтылау көзделген.
Қабылданған заңдар енді Сенаттың қарауына жіберіледі.
