Астана. 17 маусым. ИНТЕРФАКС-ҚАЗАҚСТАН – Ақмола облысындағы Астана маңындағы Қосшы қаласында NVIDIA B300 платформасы негізінде жасалған суперкомпьютерлік кластер 2026 жылдың қазан айында пайдалануға беріледі. Бұл туралы «Самұрық-Қазына» АҚ басқарма төрағасы Нұрлан Жақыпов мәлімдеді.
«Самұрық-Қазына» қоры басшысының есебін Мемлекет басшысы Қасым-Жомарт Тоқаев қабылдады. Бұл жөнінде Президенттің баспасөз қызметі хабарлады.
Кездесу қорытындысы бойынша таратылған ақпаратта Нұрлан Жақыповтың Қосшы қаласында жаңа суперкомпьютерлік кластерді іске қосу жоспарлары туралы баяндағаны айтылған.
«2026 жылдың қазан айында Қосшы қаласында NVIDIA B300 базасындағы жаңа суперкомпьютерлік кластерді іске қосу жоспарланып отыр», – делінген хабарламада.
Жаңа кластер іске қосылғаннан кейін «Қазақтелеком» компаниясына тиесілі суперкомпьютердің есептеу қуаты төрт есеге артады.
Бұл өз кезегінде Қазақстанның жасанды интеллект, деректерді өңдеу және жоғары өнімді есептеулер саласындағы мүмкіндіктерін едәуір кеңейтуге жол ашады.
Бұған дейін Ақмола облысының Қосшы қаласында қуаты 4 320 петафлопс болатын AI-Farabium-II суперкомпьютерін қараша айында іске қосу жоспарланғаны хабарланған еді.
«Қазақтелеком» АҚ басқарма төрағасы Бағдат Мусиннің мәліметінше, AI-Farabium-II суперкомпьютері өнімділігі 1,5 мың петафлопс болатын Алматыдағы AI-Farabium жүйесінен шамамен үш есе қуатты болады.
