Вашингтон. 1 қараша. ИНТЕРФАКС – Иран АҚШ-пен қақтығыс барысында Таяу Шығыстағы америкалық 26 әскери база мен нысанды қиратқан немесе зақымдаған. Соның салдарынан әскери техника мен жабдықтарға миллиардтаған доллар шығын келген, деп хабарлады The Associated Press агенттігі хабардар дереккөздер мен спутниктік мәліметтерге сілтеме жасап.
Иран ең алдымен ерте ескерту жүйелерін нысанаға алып, содан кейін ұшақтар мен өзге де әскери нысандарға соққы берген.
Агенттік жүргізген талдауға сәйкес, тамыз айына дейін баллистикалық зымырандар мен ұшқышсыз ұшу аппараттары арқылы жасалған 115-тен астам соққының салдарынан 26 әскери база мен нысан қираған немесе зақымданған.
Бұл шабуылдар әуе техникасы орналасқан орындарға, әуе шабуылына қарсы қорғаныс және байланыс жүйелеріне, қоймалар мен түрлі әскери техникаларға кейінгі соққыларды жасауға жол ашқан. Аталған нысандар әскери базалардың жұмысын қамтамасыз етуде шешуші рөл атқарған.
Агенттік мәліметінше, келтірілген шығын АҚШ-тың Таяу Шығыстағы әскери жағдайына айтарлықтай әсер еткен. Өңірдегі хабардар дереккөздің айтуынша, Вашингтон Парсы шығанағы аймағынан көптеген әскери құралдары мен күштерін әкетуге мәжбүр болған.
АҚШ Қарулы күштерінің Таяу Шығыстағы Орталық қолбасшылығы (CENTCOM) операциялардың қауіпсіздігін қамтамасыз ету қажеттігін алға тартып, агенттікке түсініктеме беруден және әскери базалар мен техниканың зақымдануына қатысты мәліметтерді нақтылаудан бас тартты.
Пентагон өкілі Шон Парнелл америкалық «әскери күштер мен базалардың сенімді қорғалғанын, ал АҚШ Қарулы күштерінің бұрын-соңды болмаған деңгейде қуатты екенін» мәлімдеді.
«Орталық қолбасшылықтың жауапкершілік аймағындағы әскери қызметшілеріміз тарихи маңызы бар міндетті, яғни Иранның ядролық қаруға қол жеткізуіне жол бермеу миссиясын табысты жалғастыру үшін қажетті барлық құралдармен қамтамасыз етілген», – деді Парнелл агенттікке берген мәлімдемесінде.
