Астана. 18 маусым. ИНТЕРФАКС-ҚАЗАҚСТАН – Қазақстан Парламенті Сенаты бейсенбі күнгі пленарлық отырыста Үкімет пен Жоғары аудиторлық палатаның 2025 жылғы республикалық бюджеттің атқарылуы туралы есептерін тыңдады.
Бұған дейін Мәжілісте Қаржы министрі Мәди Такиев 2025 жылдың қорытындысы бойынша Қазақстан экономикасы 6,5%-ға өскенін, ал инфляция деңгейі 12,3%-ды құрағанын мәлімдеген болатын.
Министрдің мәліметінше, 2025 жылдың соңында мемлекеттік борыш көлемі жалпы ішкі өнімнің 22,8%-ына немесе 36,4 трлн теңгеге жетті. Республикалық бюджет кірістері 21,4 трлн теңгені құрады. Трансферттерді есептемегендегі меншікті кірістер көлемі 17,5%-ға өсіп, 15,3 трлн теңгеге жетті. Республикалық бюджет шығыстары 99%-ға орындалып, 25,5 трлн теңгені құрады.
Жоғары аудиторлық палатаның төрағасы Әлихан Смайылов бұған дейін Мәжілісте жалпы ішкі өнім бойынша болжамның 9 трлн теңгеге артық орындалғанына қарамастан, бюджетке 335 млрд теңге түспегенін хабарлаған болатын.
«Мұның барлығы жоспарлаудағы кемшіліктер мен салық түсімдері жөніндегі шамадан тыс оптимистік болжамдардың салдары», – деп атап өткен еді Смайылов.
Мемлекеттік аудиторлардың бағалауынша, бюджет тапшылығы әлі де айтарлықтай жоғары деңгейде қалып отыр, ал оны қысқарту жөніндегі жоспарды орта мерзімді перспективада жүзеге асыру шынайы емес.
Сонымен қатар Жоғары аудиторлық палата өткен жылы квазимемлекеттік сектордың экономика мен мемлекеттік қаржы жүйесіне ықпалы айтарлықтай өзгермегенін, ал оның бюджетке тәуелділігі күшейгенін атап өтті.
«Жалпы алғанда, бюджет қаражатын игеру үдерісі атқарушылық тәртіптің төмен деңгейімен және нәтижеліліктің шектеулілігімен қатар жүруде», – деп мәлімдеді Смайылов.
