Астана. 18 маусым. ИНТЕРФАКС-ҚАЗАҚСТАН – Қазақстан Президенті Қасым-Жомарт Тоқаев елдегі жетекші медициналық жоғары оқу орындарын одан әрі нығайтудың маңызын атап өтіп, медициналық білім беру жүйесін дәйекті түрде жаңғыртудың стратегиялық мәнге ие екенін мәлімдеді.
«Еліміздің жетекші медициналық жоғары оқу орындарын одан әрі нығайтуды қолдау маңызды деп санаймын. Медициналық білім беру жүйесін дәйекті түрде жаңғырту – елдің болашағы мен ұлт денсаулығын сақтау тұрғысынан стратегиялық маңызға ие», – деді Тоқаев бейсенбі күні Медицина қызметкерлері күніне арналған салтанатты іс-шарада сөйлеген сөзінде.
Мемлекет басшысы салалық жоғары оқу орындарының дәстүрлі білім беру мекемелерінен заманауи ғылым мен жоғары технологиялар орталықтарына айналып келе жатқанын, білім беру үдерісінің жетілдіріліп, клиникалық оқыту әдістерінің кеңейтіліп жатқанын атап өтті.
«Интернатура кәсіби даярлықтың толыққанды кезеңіне айналуда. Енді оны тәмамдаған түлектер базалық бейін бойынша толыққанды дербес дәрігер ретінде практикалық қызметке кіріседі. Жаңа буын мамандарын даярлайтын жетекші медициналық жоғары оқу орындарын одан әрі нығайтуды қолдау маңызды деп санаймын», – деді Тоқаев.
