Zakon.kz хабарлайды: «Үкімет 2026 жылғы 12 маусымдағы қаулысымен Қазақстан Республикасы Қорғаныс министрлігі туралы ережеге өзгерістер мен толықтырулар енгізді. Түзетулер арқылы ведомствоның мынадай құқықтары кеңейтілді:
- өз құзыреті шегінде орындалуы міндетті құқықтық актілер қабылдау;
- мемлекеттік органдардан, ұйымдардан, олардың лауазымды тұлғаларынан заңнамада белгіленген тәртіппен қажетті ақпарат пен материалдарды сұрату және алу;
- өз құзыреті шегінде консультативтік-кеңесші және сараптамалық комиссиялар құру;
- сотқа жүгіну;
- тексерулер мен сараптамалар жүргізуге басқа ұйымдардың мамандарын тарту;
- ҚР азаматтарын ерікті түрде министрліктің әскери барлау органдарының штаттан тыс жедел қызметкерлері ретінде тарту(жаңадан енгізілді. – Ред. ескертпесі);
- заңнамада белгіленген тәртіппен өз өкілеттіктері мен функцияларының бір бөлігін ведомствоға беру (делегирлеу);
- ҚР Президентіне және Үкіметке министрлік реттейтін салалардағы қызметті жетілдіру бойынша ұсыныстар енгізу;
- демеушілік, қайырымдылық көмекті, сондай-ақ әскери-техникалық ынтымақтастық аясында көрсетілетін көмекті алу және пайдалану.
Сондай-ақ министрлікке жаңа функция қосылды: Қазақстан Республикасының азаматтарын ерікті түрде министрліктің әскери барлау органдарының штаттан тыс жедел қызметкерлері ретінде жұмысқа тарту қағидаларын бекітеді. Қаулы 27 маусымнан бастап қолданысқа енгізіледі».
Еуразия24 пікірі:
Қорғаныс министрлігінің қазақстандық еріктілерді әскери барлаудың штаттан тыс жедел қызметкерлері ретінде тарту, сондай-ақ демеушілік және қайырымдылық көмегін алу әрі пайдалану жөніндегі жаңа өкілеттіктері қоғамда бірқатар сұрақтар туындатуда. Әрине, белгілі бір дәрежеде полиция немесе сыбайлас жемқорлыққа қарсы қызметтің қоғамдық көмекшілері туралы түсінік қалыптасқан. Алайда барынша жабық күштік құрылымдардың бірі саналатын әскери барлауда ерікті негізде жұмыс істейтін қызметкерлер институтын елестету оңай емес. Дегенмен гибридтік қауіп-қатерлер дәуірінде Қорғаныс министрлігі үшін бейбіт тұрғындармен, әсіресе әлеуметтік желілердегі ақпаратты талдау және шекара маңындағы ахуалды бағалау бағыттарында ынтымақтастықты кеңейту мүмкіндігі ашылуы ықтимал. Бұл ретте ведомство аталған салалар бойынша кадрларды даярлауда уақыт жағынан кешігіп отырғанын ескерсек, бағдарламашылардың, инженерлердің, дрон технологиялары, логистика және байланыс салаларының мамандарының көмегіне үміт артылып отырған болуы мүмкін. Осыған байланысты Қорғаныс министрлігі бекітетін ерікті барлау қызметкерлеріне қатысты қағидалардың қандай болатыны да қызығушылық тудырады.
Ал армияға қайырымдылық көмек көрсету мәселесіне келсек, ең алдымен мұндай бастаманың енгізілуіне қолданыстағы мемлекеттік қамтамасыз ету көлемінің жеткіліксіздігі себеп болды ма деген сұрақ туындайды. Немесе қайырымдылық қаражаттарын тарту гуманитарлық жобаларды қаржыландыруға, сондай-ақ Қарулы күштердің шығыс баптарына кірмеуі мүмкін ардагерлер мен қаза тапқан әскери қызметшілердің отбасыларын қолдауға бағытталған ба деген мәселе де маңызды. Сонымен қатар кімдерге қайырымдылық жасаушы болуға рұқсат берілетіні, армияға қандай мүлікті немесе көмекті беруге болатыны, оның қандай шарттармен жүзеге асырылатыны және бұл үдерістің қаншалықты ашық болатыны да айрықша мәнге ие. Әзірге Қорғаныс министрлігі туралы жаңа ереже жауаптардан гөрі сұрақтарды көбірек туындатып отыр.
