Kapital басылымы хабарлағандай, Ұлттық қор қаражатының мақсатсыз әрі тиімсіз пайдалану фактілері туралы Жоғары аудиторлық палата төрағасы Әлихан Смайылов мәлімдеді. (…) Оның айтуынша, ел үшін стратегиялық маңызы бар бағыттарға жұмсалуға тиіс қаржы жекелеген жағдайларда жергілікті деңгейдегі жобаларға бағытталған. Олардың қатарында көшелер мен қоғамдық кеңістіктерді абаттандыру, ауылдық клубтар салу және көшелерді жарықтандыру жобалары бар. «Ұлттық қор қаражаты стратегиялық және жалпыұлттық ауқымдағы міндеттерге емес, жергілікті маңызы бар жобаларды – көшелер мен саябақтарды абаттандыруды, ауылдық клубтар салуды, көшелерді жарықтандыруды қаржыландыруға жұмсалды. Жобалардың едәуір бөлігі жобалық-сметалық құжаттамасыз, сондай-ақ жер учаскелері дайын болмай тұрып қаржыландыру тізіміне енгізілді», – деді Әлихан Смайылов Сенаттың пленарлық отырысында. Жоғары аудиторлық палатаның мәліметінше, мұндай тәсілдер бұрын бекітілген жоспарларды қайта қарау қажеттілігіне әкелген. Бюджетті орындау барысында жалпы құны 100 млрд теңгеден асатын 132 жоба алып тасталды немесе басқа жобалармен алмастырылды. (…) Қолданыстағы қағидаларға сәйкес игерілмеген қаражат Ұлттық қорға қайтарылуға тиіс. Алайда іс жүзінде бұл талап толық көлемде орындалмай отыр. «Шамамен 83 млрд теңге қайтарылған жоқ», – деді Жоғары аудиторлық палатаның төрағасы.
Еуразия24 пікірі:
Жоғары аудиторлық палата тарапынан анықталған «тосын жайттар» мұнымен шектелмейді. Жуырда біз 2025 жылғы республикалық бюджеттің орындалу қорытындылары бойынша Жоғары аудиторлық палата қандай кемшіліктерді анықтағанын егжей-тегжейлі жазған едік Енді міне, «ақылға қонбайтын ақиқаттың» тағы бір көрінісі жария болды. Жоғары аудиторлық палатадан келіп жатқан жаңалықтарға алғашқы реакция біреу-ақ: «ұят та жоқ, жауапкершілік те жоқ, ал кінәлілердің аты-жөні мүлде аталмайды». Ел мұндай «ерліктердің» авторларын білуі тиіс емес пе? Өйткені дәл солардың әрекеттерінің салдарынан Ұлттық қордың мұнайдан түскен қаражаты қандай да бір себептермен тұрмыстық сипаттағы мәселелерді шешуге жұмсалып отыр. Мұндай жағдайға қалай жол берілді? Әкімдер Ұлттық қордың жанынан өтіп бара жатып, кездейсоқ миллиардтарды «ілестіріп» кетті деу қиын ғой. Егер Жоғары аудиторлық палата жалпы құны 100 млрд теңгені құрайтын 132 жобаны жобалық-сметалық құжаттаманың және дайын жер учаскелерінің болмауына байланысты іске асыру барысында алып тастауға немесе ауыстыруға тура келгенін ашық айтып отырса, бұл жай ғана кездейсоқтық емес, басқару жүйесінің ахуалын көрсететін белгі. Жаһандық реформалар мен болашақ ұрпақтың мүддесі үшін құрылған елдің стратегиялық резерві өңірлік деңгейдегі әртүрлі бастамаларға жұмсалып, ақыр соңында асфальтқа «сіңіп» кетіп жатыр. Осындай жағдайдан кейін кем дегенде жария түрде сөгіс жариялана ма?
