Астана. 19 маусым. ИНТЕРФАКС-ҚАЗАҚСТАН – Қазақстан Президенті Қасым-Жомарт Тоқаев Черногория Президенті Яков Милатовичтің ресми сапарын екіжақты қатынастар үшін маңызды оқиға деп атап, тараптар арасындағы келіссөздер екі елдің өзара іс-қимылына жаңа серпін беретініне сенім білдірді.
«Сіздің Қазақстанға ресми сапарыңызға өте қуаныштымын. Біз Черногория мемлекеті басшысының тарихтағы алғашқы сапарына ерекше мән береміз. Бұл сапарды еліміз үшін аса маңызды оқиға деп санаймыз. Келіссөздеріміздің нәтижелері екіжақты қарым-қатынастарға жаңа серпін береді деп сенемін», – деді Тоқаев жұма күні Астанада өткен шағын құрамдағы келіссөздердің қорытындысы бойынша. Президенттің сөзін оның баспасөз қызметі таратты.
Тоқаев Милатовичті Черногория тәуелсіздігінің 20 жылдығымен құттықтады.
«Осы жылдар ішінде біз жақсы қарым-қатынас орнаттық. Енді өзара іс-қимылымызды жаңа мазмұнмен толықтыру қажет деп ойлаймын. Бұған ешқандай кедергі жоқ. Сізбен бірге келген іскерлік делегацияның құрамы өте ауқымды. Бұл сіздің экономикалық және іскерлік байланыстарды кеңейтуге деген ниетіңізді көрсетеді», – деді Қазақстан Президенті.
Өз кезегінде Милатович екіжақты ынтымақтастық көкжиегі кеңейетініне сенім білдірді.
«Бұл сапар біздің байланыстарымыздың жаңа, жоғары деңгейге көтерілгенін көрсетеді. Мен мұнда достас елдің өкілі ретінде келдім. Менімен бірге Черногория бизнесінің өкілдері де келді. Екі елдің сауда палаталары бизнес-форум өткізеді, бірқатар меморандумдарға қол қойылады», – деді ол.
Черногория Президенті оның елі қазақстандықтар үшін танымал туристік бағыттардың бірі екенін де еске салды.
«Біз бұл бағыттағы байланыстарымызды одан әрі нығайтқымыз келеді. Сонымен қатар саяси ынтымақтастықпен қатар экономикалық әріптестікті кеңейту мүмкіндіктерін де сізбен талқылағымыз келеді», – деді Милатович. Оның сөзін Қазақстан Президентінің баспасөз қызметі келтірді.
