Лондон. 19 маусым. ИНТЕРФАКС – Иран футбол федерациясы ұлттық құраманың әлем чемпионаты кезіндегі қозғалысына қойылған шектеулерге байланысты ФИФА-ға ресми шағым жолдайды. Бұл туралы жұма күні The Guardian газеті хабарлады.
«Иран футбол федерациясы ресми түрде наразылық білдіріп, ФИФА-ға ресми шағым түсіреді», – делінген федерация мәлімдемесінде.
Иран құрамасына Мексикадан Лос-Анджелеске Бельгияға қарсы матчқа небәрі бір күн қалғанда ғана ұшып келе алатыны хабарланған. Кездесу жексенбі күні жергілікті уақыт бойынша сағат 12:00-де өтеді.
Иран тарапы АҚШ-қа ойыннан екі күн бұрын келуге рұқсат сұраған. Себебі матч ерте басталады әрі футболшылардың климаттық жағдайларға бейімделуіне уақыт қажет.
Федерация ұйымдастырушылар енгізген мұндай шектеулер «барлық қатысушыларға тең жағдай жасау қағидатына сәйкес келмейді және матчқа дайындық сапасына кері әсер етуі мүмкін» деп есептейді.
Сондай-ақ ирандық тарап ойыншылардың Жаңа Зеландиямен өткен матчтан кейін Лос-Анджелесте қосымша бір күн қалуына мүмкіндік берілмей, бірден Мексикадағы жаттығу базасына қайтарылғанына да наразылық білдірді. Федерацияның пікірінше, бұл шешім футболшылардың толық қалпына келуіне кедергі келтірген.
Иран құрамасы әлем чемпионатына қатысып жатқан өзге командалардан ерекшеленіп, АҚШ-та емес, Мексикада орналастырылған. Топтық кезеңде ирандық футболшылар АҚШ аумағында Бельгия және Мысыр құрамаларына қарсы матчтар өткізеді.
