Варшава. 23 маусым. ИНТЕРФАКС – Польшаның құбыр инфрақұрылымының операторы PERN Aramco Fuels Poland (AFP) компаниясымен Польша аумағындағы базаларда жанармай сақтауды көздейтін ұзақ мерзімді келісімге қол қойды.
«PERN 2028 жылы Польшаның бірнеше базасында төрт жаңа резервуар салады. AFP компаниясы үшін сақтау қуаттарының артуы операцияларды жоспарлау мен міндетті қорларды басқаруды жақсартуға, жеткізілімдердің тұрақтылығын арттыруға, сондай-ақ сұраныс өзгерістері мен логистикалық іркілістер жағдайында ішкі жанармаймен қамтамасыз ету жүйесінің орнықтылығын күшейтуге мүмкіндік береді», – деп түсіндірді поляк компаниясы.
Хабарламада AFP үшін төрт резервуар салу PERN-нің қойма және логистикалық инфрақұрылымды кеңейтуге бағытталған ауқымды инвестициялық бағдарламасының бір бөлігі екені атап өтілген.
Наурыз айында компания Колюшки қаласындағы базада көлемі 33 мың текше метр болатын сақтау қоймасын салуға келісімшарт жасаған. Жақын арада Кавице қаласында осындай тағы бір резервуарды салу жөніндегі келісімге қол қою жоспарланып отыр. Бұдан бөлек, Колюшкиде сыйымдылығы 24 мың текше метр болатын бензин сақтауға арналған тағы бір резервуар салу мәселесі қарастырылуда. Сондай-ақ жалпы көлемі шамамен 250 мың текше метрді құрайтын тағы жеті сақтау қоймасы әртүрлі жобалау кезеңінде тұр.
Бұған дейін Saudi Aramco директорлар кеңесінің төрағасы Ясир әл-Румайян Таяу Шығыстағы қақтығыстар стратегиялық қорлардың энергия ресурстарын үздіксіз жеткізудегі маңызын көрсеткенін айтып, саудиялық мемлекеттік мұнай компаниясы әлемдік мұнай сақтау желісін кеңейту мүмкіндігін қарастырып жатқанын мәлімдеген болатын.
«Aramco компаниясының әлемнің түрлі өңірлерінде, әсіресе Азияда мұнай сақтау нысандары бар. Біз мұнай сақтау қуаттарын жаһандық ауқымда ұлғайту мәселесін байыппен қарастырып жатырмыз», – деген еді ол.
