Астана. 24 маусым. ИНТЕРФАКС-ҚАЗАҚСТАН – Қазақстан Президенті Қасым-Жомарт Тоқаев Брюссельде өткен «Қазақстан – ЕО» дөңгелек үстелінде сөйлеген сөзінде еуропалық нарықтарға мұнай жеткізуді қамтамасыз ету үшін Каспий құбыр консорциумының (КҚК) тұрақты жұмысын сақтау маңызды екенін айтты.
«Біз жеткізілім көлемін ұлғайтуға және өңірлік энергетикалық қауіпсіздікті нығайтуға бағытталған еуропалық серіктестермен ынтымақтастықты кеңейту жөніндегі ұстанымымызға берік екенімізді растаймыз. Осыған байланысты Каспий құбыр консорциумының тұрақты әрі сенімді жұмысын қамтамасыз ету стратегиялық басымдықтардың бірі болып қала береді», – деді Тоқаев.
Президенттің сөзін оның баспасөз қызметі келтірді.
Мемлекет басшысының айтуынша, өткен жылы Еуропа нарығына жеткізілген мұнайдың шамамен 13 пайызы Қазақстанның үлесіне тиесілі болған.
Тоқаевтың пікірінше, Қазақстан Еуропалық одақ үшін сенімді серіктес әрі энергия ресурстарын жеткізудің кепілі ретіндегі стратегиялық ұстанымын дәйекті түрде нығайтып келеді.
КҚК Батыс Қазақстандағы және Каспий теңізі қайраңындағы Ресейдің мұнай кен орындарын Новороссийск қаласындағы теңіз терминалымен байланыстырады. Құбыр желісінің ұзындығы 1,5 мың шақырымды құрайды. Бұл – қазақстандық мұнайды экспорттаудың негізгі бағыты. Елден құбыр арқылы тасымалданатын мұнай көлемінің 80 пайыздан астамы осы жүйе арқылы өтеді.
КҚК Қазақстан аумағынан жылына шамамен 72,5 млн тонна мұнайды, ал Ресей аумағы арқылы жылына 83 млн тоннаға дейін мұнайды тасымалдауға қауқарлы.
КҚК акционерлері: Ресей Федерациясы («Транснефть» басқаруындағы үлес – 24%, балансындағы үлес – 7%) – 31%, Қазақстан («ҚазМұнайГаз» – 19% және Kazakhstan Pipeline Ventures LLC – 1,75%) – 20,75%, Chevron Caspian Pipeline Consortium Company – 15%, LUKOIL International GmbH – 12,5%, Mobil Caspian Pipeline Company – 7,5%, Rosneft-Shell Caspian Ventures Limited – 7,5%, BG Overseas Holding Limited – 2%, Eni International N.A. N.V. – 2% және Oryx Caspian Pipeline LLC – 1,75%.
