Астана. 24 маусым. ИНТЕРФАКС-ҚАЗАҚСТАН – Қазақстан Еуропалық одақтың стратегиялық маңызды шикізат ресурстары тізіміне енгізілген 34 минералдың 21-ін еуропалық серіктестерге жеткізе алады. Бұл туралы Қазақстан Президенті Қасым-Жомарт Тоқаев мәлімдеді.
«Қазақстан ЕО-ның стратегиялық маңызды шикізат ресурстары тізіміне кіретін 34 минералдың 21-ін жеткізуге дайын. Осы әлеуетті толық пайдалану үшін біз ынтымақтастықтың оффтейк-модель негізіндегі тетігін ұсынамыз. Бұл ішкі өңдеу саласын дамытуға және қосылған құны жоғары өндірістер құруға мүмкіндік береді», – деді Тоқаев Брюссельде өткен «Қазақстан – ЕО» дөңгелек үстелінде.
Президенттің сөзін оның баспасөз қызметі келтірді.
Мемлекет басшысының айтуынша, бұл әріптестіктің нәтижесінде Сирек жер металдарын зерттейтін өңірлік ғылыми орталық құрылады.
Тоқаев Қазақстан әлемдегі ең ірі уран өндіруші ел екенін және жаһандық сұраныстың шамамен 40 пайызын қамтамасыз ететінін еске салды.
«Мұнай, газ және көмірдің мол қорымен қатар біз “жасыл” сутегі өндірісі бағытындағы жобаларды белсенді түрде дамытып келеміз. Сонымен бірге Қазақстан аумағында литийдің, никельдің, ванадийдің және кобальттың игерілмеген ірі кен орындары бар. Түптеп келгенде, біз серіктестерімізге еуропалық стандарттарға толық сай келетін прагматикалық қағидатты ұсынамыз: стратегиялық ресурстарға қолжетімділік үшін инвестициялар мен технологиялар», – деді президент.
