Астана. 24 маусым. ИНТЕРФАКС-ҚАЗАҚСТАН – Испанияның Inditex тобы Қазақстандағы қызмет аясын кеңейтіп, елді Орталық Азиядағы негізгі көлік-логистикалық орталықтардың біріне айналдыруды жоспарлап отыр.
Бұл мәселе Брюссельде Қазақстан Президенті Қасым-Жомарт Тоқаевтың Inditex Group компаниясы бас директорының орынбасары әрі сыртқы байланыстар жөніндегі директоры Сантьяго Мартинес-Лахе Собредомен кездесуінде талқыланды, деп хабарлады Мемлекет басшысының баспасөз қызметі.
«Президент әлемдегі жетекші ритейлерлердің бірі саналатын Inditex компаниясының Қазақстандағы қызметін кеңейтіп, елімізді Орталық Азиядағы негізгі көлік-логистикалық хаб ретінде дамыту жоспарын құптады», – делінген хабарламада.
Сонымен қатар Қасым-Жомарт Тоқаев уақыт өте келе компанияның тек логистикамен шектелмей, Қазақстанда тоқыма өнеркәсібі бағытында өндіріс орындарын ашуына мүмкіндік бар екеніне сенім білдірді.
Өз кезегінде компания өкілі Қазақстандағы кәсіпкерлік пен инвестиция үшін жасалған қолайлы жағдайларды атап өтіп, бизнесті одан әрі дамыту жоспарларымен бөлісті.
Қазіргі таңда құрамына Zara, Pull&Bear, Massimo Dutti және Bershka сияқты танымал брендтер кіретін Inditex Қазақстанның сауда нарығында кеңінен ұсынылған. Компания Алматы және Қарағанды әуежайларының базасында өңірлік логистикалық хаб қалыптастырып жатыр.
