Qumash басылымының хабарлауынша, Қазақстан мұсылмандары діни басқармасы (ҚМДБ) childfree үрдісіне қатысты пәтуа жариялады. Құжатта бұл ұғым балалы болудан саналы түрде бас тартуды насихаттайтын субмәдениет ретінде сипатталған. Аталған түсінік ерлерге де, әйелдерге де бірдей қатысты. Діни басқарманың мәліметінше, бүгінде бұл идеология әлеуметтік және мәдени тұрғыдан кеңінен талқыланатын тақырыптардың біріне айналып отыр. «Childfree ұстанымын жақтаушылар көбіне бала тәрбиесіне кететін шығындарды көтергісі келмейтінін, қосымша жауапкершілік алудан қашатынын, жеке еркіндік пен кәсіби дамуды бірінші орынға қоятынын, сондай-ақ “менің денем – менің таңдауым” қағидатын басшылыққа алатынын айтады», – делінген хабарламада. ҚМДБ шариғат тұрғысынан алғанда балалы болудан саналы түрде бас тарту құпталмайтынын атап өтті. «Бұл ұстаным адамның жаратылысына қайшы келеді. Отбасы құру және ұрпақ өрбіту – адамның табиғи қажеттіліктерінің бірі. Сондай-ақ некенің басты мақсаттарының бірі – адамзат ұрпағын жалғастыру және текті сақтау», – деп түсіндірді діни басқарма өкілдері. Исламда бала сүю ерлі-зайыптылардың ортақ құқығы саналады. Сондықтан жұбайлардың бірі бала сүйгісі келсе, екіншісі оған кедергі келтірмеуі тиіс.
Еуразия24 пікірі:
Балалы болудан саналы түрде бас тарту мәселесі қоғамдағы дүниетанымдық көзқарастармен тығыз байланысты. Сондықтан бұл тақырыпты талқылағанда діни ұстаным мен мемлекеттік қағидаттардың ара-жігін ажырата білу маңызды. Діндар мұсылмандар үшін Қазақстан мұсылмандары діни басқармасының түсіндірмелері отбасы құндылықтары мен адамгершілік мәселелерінде маңызды бағдар болып саналады. Белгілі бір құбылыстарға ислам қағидаттары тұрғысынан баға беру – діни ұйымның құқығы және мұндай ұстаным құрметке лайық. Сонымен қатар Қазақстан – зайырлы мемлекет. Сондықтан отбасы қатынастары, ерлі-зайыптылардың құқықтары, бала дүниеге әкелу мен тәрбиелеу мәселелері ел Конституциясы мен қолданыстағы заңнамамен реттеледі. Мемлекет азаматтарға белгілі бір отбасы үлгісін таңдауға да, олардың өмірлік ұстанымы немесе жағдайына қарамастан ата-ана болуға міндеттеуге де құқылы емес. Ал мұндай мәселелерге діни институттардың араласу шегі қандай болуы керек деген сұрақ қоғамда әртүрлі пікір туындатуы мүмкін. Оның үстіне «childfree» ұғымының астарында әртүрлі өмірлік жағдайлар жатыр. Бір жағынан, отбасы құру мен бала сүюден бас тартуды насихаттайтын идеологиялық көзқарас бар. Екінші жағынан, қазіргі мүмкіндігін салмақтап, балаға лайықты жағдай жасай алмайтынын түсінетін жас отбасылардың таңдауы бар. Сондықтан туу көрсеткішінің төмендеуіне қатысты қоғамдық пікірталас тек моральдық бағалаулармен немесе рухани көшбасшылардың ұстанымдарымен шектелмеуі тиіс. Бұл мәселенің әлеуметтік және экономикалық себептеріне де назар аудару қажет. Өйткені бала сүюге шақырудың өзі тұрғын үйдің қолжетімділігін арттырмайды, жаңа жұмыс орындарын ашпайды, ипотеканы арзандатпайды және адамдардың ертеңгі күнге деген сенімін күшейтпейді.
