***АҚШ Кувейт пен Сауд Арабиясындағы әскери қатысуын қысқартып, күштердің бір бөлігін батысқа көшіруді және Израильде әскери базалар орналастыруды қарастырып жатыр
Вашингтон. 26 маусым. ИНТЕРФАКС – Иранның Таяу Шығыстағы америкалық әскери нысандарға, оның ішінде Бахрейндегі АҚШ Әскери-теңіз күштері базасына жасаған шабуылдарынан кейін АҚШ әскери қолбасшылығы өңірдегі күштерді орналастыру жүйесін қайта қарастыруға кірісті. Бұл туралы The Wall Street Journal басылымы дереккөздерге сілтеме жасап хабарлады.
Басылымның мәліметінше, АҚШ-тағы ресми тұлғалардың айтуынша, Бахрейндегі әскери-теңіз базасына және өңірдегі кемінде тағы 20 америкалық әскери әрі дипломатиялық нысанға келтірілген елеулі шығын АҚШ-тың аймақтағы әскери қатысу стратегиясын қайта бағалауға негіз болған.
Дереккөздердің айтуынша, қарастырылып жатқан нұсқалардың қатарында Бахрейндегі базаны қайта жаңғырту, Сауд Арабиясы мен Кувейттегі әскери қатысуды қысқарту, кейбір бөлімшелер мен қызметтерді Иран зымырандары мен ұшқышсыз ұшу аппараттарының жету аймағынан тысқары, батысқа қарай көшіру бар. Сонымен қатар зақымданған нысандардың бір бөлігін қалпына келтірмеу, ал басқару және үйлестіру орталықтарын жер астына орналастыру мүмкіндігі де қарастырылуда.
Басылымның екі дереккөзі Израильдің АҚШ әскери базаларын орналастыруы ықтимал елдердің бірі ретінде қарастырылып жатқанын айтты.
Сондай-ақ АҚШ өңірдегі әскери күштерін кеңірек аумаққа таратып орналастыру мүмкіндігін де зерделеуде. Алайда әзірге бұл мәселелер бойынша түпкілікті шешім қабылданбаған.
The Wall Street Journal спутниктік суреттерді, әлеуметтік желілердегі бейнематериалдарды зерттеп, әскери сарапшылармен сөйлескеннен кейін Бахрейндегі АҚШ Әскери-теңіз күштерінің базасында Бесінші флоттың штаб-пәтері, оқу-жаттығу залдары, казармалар, бірнеше қойма, су резервуары, екі спутниктік байланыс станциясы және ақпарат алмасуды басқару орталығы зақымданғанын анықтаған.
Сонымен бірге америкалық әскери қызметкерлердің мәлімдеуінше, шабуыл салдарынан адам шығыны болмаған. Әскери қызметкерлердің басым бөлігі алдын ала эвакуацияланған, ал шабуылдар АҚШ-тың өңірдегі операцияларына елеулі әсер еткен жоқ.
Басылымның еске салуынша, сәуір айында АҚШ билігі коммерциялық спутник операторларына қысым жасап, америкалық әскери базалар мен әскери іс-қимыл аймақтарындағы зақымдарды көрсететін спутниктік суреттерге жұртшылықтың қолжетімділігін шектеуді сұраған. Ақ үй бұл қадам америкалық әскери қызметкерлердің қауіпсіздігін қамтамасыз етуге бағытталғанын мәлімдеген.
