Брюссель. 26 маусым. ИНТЕРФАКС – Запорожье атом электр станциясын (ЗАЭС) электрмен қамтамасыз ететін 750 кВ-тық «Днепровская» негізгі электр беру желісі оған жалғанған қосалқы станцияның зақымдануына байланысты әзірге қайта іске қосылған жоқ. Бұл туралы жұма күні Халықаралық атом энергиясы агенттігі (МАГАТЭ) хабарлады.
Агенттіктің баспасөз хабарламасында айтылғандай, «Днепровская» желісіне қосылған, ЗАЭС-тен солтүстік-батысқа қарай 100 шақырымнан астам жерде орналасқан қосалқы станция айтарлықтай зақымданған. Мәлімет бойынша, ол мамыр айының соңындағы әскери іс-қимылдар кезінде бүлінген.
МАГАТЭ сарапшылары осы аптада аталған нысанды аралап, аса маңызды жабдықтардың елеулі зақымданғанын тіркеген.
«Қалпына келтіру жұмыстары жақын арада аяқталады деп күтілмейді. Дегенмен жөндеу жалғасып жатыр, агенттік жағдайды бақылауда ұстайды», – делінген хабарламада.
Сонымен қатар МАГАТЭ мәліметінше, 750 кВ-тық «Днепровская» желісінің өзінде және станцияның басқа да энергетикалық инфрақұрылым нысандарында жөндеу жұмыстары аяқталған.
«Бұл станцияның электр желісіне қолжетімділігін күшейтіп, әскери қақтығыс жағдайында ядролық оқиға қаупін төмендетуге бағытталған шаралардың бір бөлігі», – деп келтірілген агенттік бас директоры Рафаэль Гроссидің сөзі.
Баспасөз хабарламасында жоғары кернеулі электр желісін қалпына келтіру жұмыстары кең көлемді минасыздандырудан кейін және МАГАТЭ-нің арағайындығымен келісілген жергілікті атысты тоқтату режимі жағдайында, майдан шебіне жақын аумақта жүргізілгені атап өтілген.
«Өткен жылдың соңынан бері ЗАЭС-тің ядролық қауіпсіздігін қамтамасыз ету үшін келісілген алты уақытша атысты тоқтату режимінің ішінде осы келісімді жүзеге асыру ең күрделісі болды. Бұған бірнеше айға созылған келіссөздер, кейін Днепр өзені арқылы өтетін жоғары кернеулі электр бағаналарын минадан тазарту және жөндеу жұмыстары себеп болды», – деді Рафаэль Гросси.
Оның айтуынша, жөндеу жұмыстарын жүргізуге мүмкіндік беру үшін екі тарап та агенттікпен сындарлы ынтымақтастық орнатқан.
Қазіргі уақытта ЗАЭС өз қажеттілігіне арналған электр энергиясын Днепр өзенінің Украина бақылауындағы оң жағалауынан екі желі арқылы алады. Олар – негізгі 750 кВ-тық «Днепровская» желісі және резервтік 330 кВ-тық «Ферросплавная-1» желісі. «Днепровская» желісі электр бағаналары зақымданғаннан кейін наурыз айының соңынан бері ажыратылған.
Запорожье атом электр станциясы – Еуропадағы ең ірі атом электр станциясы. Оның құрамында ВВЭР-1000 үлгісіндегі алты энергоблок бар. Станция 2022 жылғы 11 қыркүйектен бері электр энергиясын өндірмейді. Қазіргі уақытта барлық алты реактор «суық тоқтату» режимінде тұр.
МАГАТЭ мәліметінше, сәуір айының соңынан бері ЗАЭС аумағы мен Энергодар қаласы бірнеше рет шабуылдарға ұшыраған.
Қазіргі уақытта ЗАЭС нысандары Ресейдің «Запорожская АЭС» федералдық мемлекеттік унитарлық кәсіпорнының құрамына енгізілген және Ресей Федерациясының меншігіне жатады. Станцияның операторы – «Росэнергоатом» акционерлік қоғамы құрған «Запорожье АЭС пайдалану ұйымы» акционерлік қоғамы.
