Астана. 26 маусым. ИНТЕРФАКС-ҚАЗАҚСТАН – Иранның Бендер-Аббас портында қазақстандық жүк терминалын салу туралы келісім соңғы келісу кезеңінде тұр. Бұл туралы Премьер-министрдің орынбасары – Ұлттық экономика министрі Серік Жұманғарин мәлімдеді.
«Біз жүк ауыстырып тиеуге арналған терминал салуды жоспарлап отырмыз. Ол Бендер-Аббас портында орналасады, жер телімінің аумағы – 15 гектар. Жобаға бюджет қаражаты қарастырылмаған, ол жеке инвестиция есебінен жүзеге асырылады. Менің білуімше, келісімге қол қою мәселесі соңғы кезеңге жетті», – деді Серік Жұманғарин жұма күні Парламент палаталарының бірлескен отырысынан кейін өткен баспасөз мәслихатында.
Министрдің айтуынша, жаңа терминал Қазақстанға Ақтау – Түрікменстан бағыты арқылы өтетін қолданыстағы теміржол дәлізін пайдаланып, Парсы шығанағы порттарына шығуға мүмкіндік береді. Бұл өз кезегінде Үндістан, Шығыс Африка, Парсы шығанағы елдері мен Оңтүстік-Шығыс Азия нарықтарына экспорт көлемін ұлғайтуға жол ашады.
Сонымен қатар Серік Жұманғарин қазіргі таңда Иран арқылы Қазақстанның бірқатар тауарларын транзитпен тасымалдауға қолданыстағы санкциялар кедергі келтіріп отырғанын айтты.
Оның сөзінше, егер Иран мен АҚШ арасында тиісті келісімге қол қойылса, Қазақстан Иранға экспорт көлемін де, осы елдің аумағы арқылы өтетін транзиттік тасымалды да кеңейте алады.
Министр сондай-ақ балама бағыт ретінде Қазақстан Ауғанстан арқылы Пәкістанның терең су айлақтарына шығатын теміржол салу жобасын қарастыруды жалғастырып жатқанын жеткізді.
Бұдан бөлек, Серік Жұманғариннің айтуынша, Иран Ормуз бұғазынан тыс орналасқан Чабахар портына дейінгі теміржол желісінің құрылысын аяқтауға жақын.
Бұған дейін Иран Қазақстанға Оңтүстік және Оңтүстік-Шығыс Азия нарықтарына шығуға мүмкіндік беретін Чабахар портында жұмыс істеу мүмкіндігін ұсынуға дайын екенін растаған болатын.
