Астана. 7 шілде. ИНТЕРФАКС-ҚАЗАҚСТАН – Қазіргі уақытта Қарашығанақ кен орнында тәулігіне 28 мың тонна сұйық көмірсутек өндірілуде. Бұл туралы «ҚазМұнайГаз» ұлттық компаниясының басқарма төрағасы Асхат Хасенов Үкіметтегі брифингте мәлімдеді.
«Бүгінде Қарашығанақтағы тәуліктік өндіріс көлемі 28 мың тоннаны құрайды», – деді Хасенов.
Бұған дейін Энергетика министрі Ерлан Ақкенженов кен орнында қалыпты жағдайда тәулігіне 34 мың тонна сұйық көмірсутек өндірілетінін айтқан болатын.
Сонымен қатар, ҚМГ басшысы қазіргі кезде Қарашығанақтан Орынбор газ өңдеу зауытына сағатына 290 мың текше метр газ жеткізіліп жатқанын, бұл қалыпты көлемнің 29%-ына ғана тең екенін нақтылады.
Бұған дейін хабарланғандай, маусым айының соңында Орынбор газ өңдеу зауытында болған оқиғаға байланысты Қазақстандағы ең ірі мұнай-газ кен орындарының бірі – Қарашығанақтағы өндіріс көлемі қысқартылған еді.
Сол кезде Қазақстанның Энергетика министрі Ерлан Ақкенженов газ қабылдау көлемі азайғанымен, елді газбен қамтамасыз етуге бұл жағдай әсер етпегенін мәлімдеген.
Еске салсақ, Қарашығанақ кен орнынан өндірілетін шикі газ «Газпромның» Орынбор газ өңдеу зауытына жеткізіледі. Өңдеуден кейін оның бір бөлігі Қазақстанға тауарлық және сұйытылған газ түрінде қайтарылады. Қарашығанақта ілеспе газ өндіру мұнай мен газ конденсатын өндірумен тікелей байланысты.
24 маусымда Қазақстанның Энергетика министрлігі Орынбор газ өңдеу зауытындағы оқиғаға байланысты газ жеткізу логистикасы қайта қаралғанын және елдің отынға деген сұранысы өзге көздер есебінен қамтамасыз етіліп жатқанын хабарлаған болатын.
«Газпром» мен «ҚазМұнайГаз» 2002 жылдан бері «ҚазРосГаз» бірлескен кәсіпорны аясында ынтымақтастық орнатып келеді. Бұл кәсіпорын Қарашығанақ газын сатып алу, оны Орынбор газ өңдеу зауытында өңдеу және дайын өнімді Қазақстан мен Ресей тұтынушыларына өткізу мақсатында тең үлеспен құрылған.
Қарашығанақ кен орнынан газ сатып алу-сату жөніндегі ұзақ мерзімді келісімге жоба операторы Karachaganak Petroleum Operating B.V. мен «ҚазРосГаз» 2007 жылы қол қойған. 2015 жылы келісімнің мерзімі 2038 жылға дейін ұзартылды. Құжат жылына 9 млрд текше метрге дейін газ жеткізуді көздейді.
Қарашығанақ – әлемдегі ең ірі мұнай-газ кен орындарының бірі. Оның мұнай қоры 1,2 млрд тоннаны, ал газ қоры 1,35 трлн текше метрді құрайды.
