Астана. 14 шілде. ИНТЕРФАКС-ҚАЗАҚСТАН – Қазақстанның Премьер-министрі Олжас Бектенов отандық аффинаж кәсіпорындарының өндірістік қуатын толық пайдалануды, оның ішінде импорттық алтын жеткізу арқылы қамтамасыз етуді тапсырды.
«Өнеркәсіп және құрылыс министрлігіне бір ай ішінде металлургия саласын қосымша ынталандыру тетіктерін әзірлеуді тапсырамын. “Тау-Кен Самұрық” компаниясымен бірлесіп, елдегі аффинаж кәсіпорындарының толық жүктемемен жұмыс істеуін, оның ішінде елімізде аффинаж жүргізу үшін импорттық алтын жеткізуді қамтамасыз ету қажет», – деді Бектенов сейсенбі күні өткен Үкімет отырысында.
Өнеркәсіп және құрылыс министрі Ерсайын Нағаспаевтың айтуынша, отандық өндірушілер металлургиялық кәсіпорындарға жеткізетін мыс, мырыш және құрамында алтыны бар шикізат көлемі ұлғайтылған. Сонымен қатар Ауғанстан мен Қырғызстаннан шикізат импорттау жөнінде келісімдерге қол жеткізілген.
«Жалпы жоспарланған көрсеткіштерге қолданыстағы кәсіпорындардағы өндіріс көлемін ұлғайту және жаңа өндірістік қуаттарды іске қосу арқылы қол жеткізу жоспарланып отыр», – деді министр.
Бұған дейін Олжас Бектенов «Самұрық-Қазына» қорына және салалық министрліктерге елдегі металлургиялық кәсіпорындардың өндірістік қуатын толық пайдалану мақсатында құрамында алтыны бар және полиметалл шикізатын импорттау мәселесін пысықтауды тапсырған болатын.
