АСТАНА. 15 шілде. ИНТЕРФАКС-ҚАЗАҚСТАН – Мемлекет басшысы Қасым-Жомарт Тоқаев «Қазақстан Республикасы мен Халықаралық қайта құру және даму банкі арасындағы қарыз туралы келісімді (Инклюзивті және орнықты экономикалық өсуді қаржыландыру жөніндегі саясатты қолдауға арналған екінші қарыз) ратификациялау туралы» және «Қазақстан Республикасы мен Азия инфрақұрылымдық инвестициялар банкі арасындағы қарыз туралы келісімді (Инклюзивті және орнықты экономикалық өсу бағдарламасы) ратификациялау туралы» заңдарға қол қойды.
Қазақстанның Қаржы министрі Мәди Такиев бұған дейін жалпы көлемі 154,7 млрд жапон иенасын құрайтын қарыз туралы келісімдерге биылғы 20 мамыр мен 15 маусымда қол қойылғанын хабарлаған болатын.
«Қарыз валютасы ретінде жапон иенасының таңдалуы Жапониядағы базалық пайыздық мөлшерлемелердің төмен болуына, сондай-ақ теңге мен жапон иенасы бағамдарының өзара байланысының жоғары болуына байланысты», – деген еді министр.
Оның айтуынша, тартылатын қаражат Үкіметтің бірқатар бастамаларын, оның ішінде экономиканың маңызды бағыттарын қаржыландыруға мүмкіндік береді.
«Аталған банктердің қарыздары 11 жыл мерзімге, оның ішінде бес жылдық жеңілдік кезеңімен беріледі. Қарыздар бойынша міндеттемелер келісімдерде белгіленген қаржылық талаптарға сәйкес республикалық бюджет қаражаты есебінен орындалады», – деп мәлімдеген болатын Такиев.
Қарыздар бойынша сыйақы мөлшерлемесі TONA + өзгермелі спред формуласы бойынша айқындалады. Сонымен қатар қарыз сомасының 0,25 пайызы мөлшерінде біржолғы комиссия және игерілмеген қаражат қалдығына жылына 0,25 пайыз көлемінде резервтеу комиссиясы қарастырылған.
