Астана. 17 шілде. INTERFAX-ҚАЗАҚСТАН – Президент Қасым-Жомарт Тоқаев Шанхайда Таиланд Премьер-министрі Анутин Чарнвиракулмен кездесіп, екі ел арасындағы сауда-экономикалық ынтымақтастықты жандандыруды ұсынды. Бұл туралы Ақорданың баспасөз қызметі хабарлады.
Қасым-Жомарт Тоқаев Қазақстан Таиланды Оңтүстік-Шығыс Азиядағы негізгі серіктестерінің бірі ретінде қарастыратынын атап өтті.
Президент экономикалық ынтымақтастықтың әлеуетіне жоғары баға беріп, 2026 жылдың алғашқы төрт айында екі ел арасындағы тауар айналымы өткен жылдың сәйкес кезеңімен салыстырғанда 76%-ға өсіп, 110 млн АҚШ долларынан асқанын айтты.
Мемлекет басшысының пікірінше, бұл көрсеткішті ең алдымен ауыл шаруашылығы өнімдерінің экспортын ұлғайту және туризмді дамыту есебінен едәуір арттыруға болады.
Өз кезегінде Анутин Чарнвиракул Таиландтың өзара қызығушылық тудыратын мәселелердің кең ауқымы бойынша Қазақстанмен ынтымақтастықты кеңейтуге мүдделі екенін жеткізді.
Кездесу соңында Қасым-Жомарт Тоқаев Таиланд Премьер-министрін Қазақстанға ресми сапармен келуге шақырды.
