Bizmedia.kz порталының хабарлауынша, жаңа оқу жылынан бастап Қазақстан мектептерінде үш жаңа міндетті курс енгізіледі. Олар – «Конституция негіздері», «Заң және тәртіп» және «Жеке қауіпсіздік». Редакцияның сауалына жауап берген Оқу-ағарту министрлігі бұл пәндердің оқу жоспарына нақты қалай енгізілетіні жөнінде әзірге нақты түсініктеме бермеген. 2026 жылы 1 шілдеде Үкімет отырысында орта білім беру жүйесіндегі кезекті өзгерістерді таныстырған Оқу-ағарту министрі Жұлдыз Сүлейменова міндетті оқу бағдарламасы кеңейтілетінін мәлімдеді. Соған сәйкес, 5–7-сынып оқушылары үшін «Конституция негіздері» пәні енгізіледі. 8–11-сыныптарда «Заң және тәртіп» курсы оқытылады. Ал «Жеке қауіпсіздік» курсы 5–11-сынып оқушыларын қамтиды. Бұдан бөлек, 8–9-сыныптардың оқу бағдарламасына «Қазақстан географиясы» пәні қайта енгізіледі. Жаңа міндетті пәннің енгізілуі, әдетте, оқу жоспарына өзгеріс енгізуді талап етеді. Мұндайда не апталық жүктеме көбейеді, не бұрынғы пәндердің бірі қысқарады немесе басқа пәндерге бөлінетін сағат қайта бөлінеді. Алайда министрлік алғашқы нұсқаның болмайтынын нақты мәлімдеді. Редакция жолдаған сауалға берген жауабында ведомство: «Аталған оқу курстарының енгізілуі білім алушылардың оқу жүктемесін арттырмайды. Өйткені олар үлгілік оқу жоспарларында көзделген сағаттар шеңберінде оқытылады», – деп түсіндірді.
Еуразия24 пікірі:
Оқу-ағарту министрлігінің ресми жауабына сүйенген жарияланымды толық оқып шығуға кеңес береміз. Бір қызығы, жаңа пәндердің енгізілетіні жарияланғанымен, жаңа оқу жылының басталуына бір жарым ай ғана қалғанына қарамастан, үлгілік оқу жоспарлары әлі күнге дейін бекітілмеген. Ал кез келген жаңа пәнді енгізу үшін оны жүргізетін педагогтар, оқу-әдістемелік материалдар және ең бастысы, оқу жоспарынан бөлінетін сағат қажет. Өйткені мектеп бағдарламасына жаңа пәндерді шексіз қоса беріп, оның қолданыстағы пәндерге әсер етпейді деу қиын. Демек, оқушыларды алдағы оқу жылында тағы бірқатар өзгерістер күтіп тұрғаны анық. Алайда олардың нақты қалай жүзеге асырылатыны әзірге белгісіз. Еске салсақ, осы жылдың көктемінде «Информатика» және «Көркем еңбек» пәндерінің мазмұны жаңартылып, олардың құрамына 3D-модельдеу, роботтехника және жасанды интеллект бойынша міндетті модульдер енгізілетіні де хабарланған болатын. Ендігі басты мәселе – осыншама жаңашылдық оқушылардың негізгі пәндерді меңгеру сапасына кері әсер етпей ме? Өйткені PISA халықаралық зерттеуінің нәтижелері көрсеткендей, қазақстандық оқушылар әзірге оқу, математика және жаратылыстану бағыттары бойынша жоғары көрсеткіштерімен ерекшеленіп отырған жоқ.
