Париж. 1 тамыз. ИНТЕРФАКС – ФИФА президенті Джанни Инфантино футболдан әлем чемпионаттарын өткізуге сыртқы инвесторларды тартуды көздеген, қызу пікірталас тудырған жобадан бас тартатынын мәлімдеді.
ФИФА-ның ресми сайтында жарияланған мәлімдемеде: «Барлық пікірлер мұқият зерделенгеннен кейін бұл жобаға қатысты келіспеушіліктердің тым терең екені және оның жүзеге асуына мүмкіндік бермейтіні белгілі болды», – делінген.
Осыған байланысты Инфантиноның айтуынша, аталған бастама бойынша жұмыс әрі қарай жалғаспайды.
Бұған дейін Инфантиноның ұсынысы УЕФА, өзге де футбол ұйымдары және бірқатар саясаткерлер тарапынан сынға ұшыраған болатын. Олар ФИФА басшысын коммерциялық мүддені тым жоғары қоюға айыптап, бастама жүзеге асса, әлемдік футболдың дамудан гөрі табыс табуды көздейтін бизнес өкілдерінің ықпалына өтуі мүмкін деген алаңдаушылық білдірген.
Сонымен қатар бірқатар халықаралық бұқаралық ақпарат құралдары Инфантино жобадан бас тартқанымен, оның ФИФА президенті қызметінде қалу-қалмауы әзірге белгісіз екенін жазуда. The Guardian басылымының мәліметінше, бұған дейін Инфантиноның қызметіне ешқандай қауіп жоқ деп есептелген. Алайда енді бұл шешімнің оның қызметін сақтап қалуына жеткілікті бола ма, жоқ па – белгісіз.
Басылымның хабарлауынша, УЕФА мен басқа да құрлықтық конфедерациялар ФИФА президенттігіне ықтимал кандидаттарды іздеуді күшейткен. Келесі сайлау келесі жылы өтеді. Бұған дейін Инфантино төртінші мерзімге еш қиындықсыз қайта сайланады деген болжам болған. Алайда енді оның қарсыластары бұл қызметтен кетуіне қол жеткізу әрекеттерінен бас тартпайды деген пікір айтылуда.
Еске сала кетейік, Инфантино бұған дейін жылдық айналымы 20 млрд АҚШ долларын құрайтын FIFA Forward Enterprise (FFE) еншілес компаниясын құруды ұсынған еді. Жоспар бойынша бұл құрылым коммерциялық қызметпен және ірі турнирлерді ұйымдастырумен айналысуы тиіс болатын. Сондай-ақ сыртқы инвесторларға компания акцияларының 20%-ына дейін сатып алу мүмкіндігі беріледі деп көзделген. Жобаға АҚШ президенті Дональд Трамптың күйеу баласы Джаред Кушнердің ағасы, кәсіпкер Джош Кушнердің жетекші инвестор ретінде қатысуы мүмкін екені айтылған.
