Вашингтон. 1 тамыз. ИНТЕРФАКС – АҚШ Қарулы күштері Иранның ядролық нысандарына, соның ішінде Тегеранның оңтүстігіндегі Пикакс тауының астында орналасқан нысанға бірқатар соққы жасауға дайындалып жатыр. Бұл туралы CNN телеарнасы дереккөздерге сілтеме жасап хабарлады.
Америкалық ресми тұлғалардың айтуынша, мұндай дайындық соңғы бірнеше күнде күшейтілген.
АҚШ пен Израиль барлау қызметтерінің мәліметінше, Иран өткен жылдың маусымында АҚШ-тың жаппай әуе соққыларына ұшыраған өзге ядролық нысандардан уранды байытуға арналған көптеген центрифугаларды Пикакс тауының астындағы жерасты туннельдеріне көшірген.
Бұған дейін CBS News телеарнасы дереккөздерге сілтеме жасап, АҚШ пен Израиль демалыс күндері Иранның энергетикалық инфрақұрылымына соңғы уақыттағы ең ауқымды әуе соққыларының бірін жасауды жоспарлап отырғанын хабарлаған еді.
Телеарна мәліметінше, АҚШ басшылығы операцияны дүйсенбі күні қаржы нарықтары ашылғанға дейін аяқтау мүмкіндігін қарастырған. Бұл ықтимал шабуылдардың АҚШ пен әлемдік экономикаға әсеріне қатысты алаңдаушылықпен байланысты. Алайда операцияның нақты аяқталу мерзімі әзірге белгіленбеген.
Бірнеше америкалық дереккөздің хабарлауынша, Израиль бұл жоспардан хабардар және өз іс-қимылдарын АҚШ-пен үйлестіріп отыр. Сонымен қатар АҚШ президенті Дональд Трамп әзірге әскери соққылар жасауға түпкілікті рұқсат берген жоқ.
Шенеуніктердің айтуынша, әскери операция жоспары жұма күні Кэмп-Дэвидте өткен Трамптың әкімшілік мүшелерімен кеңесінде талқыланған. Дереккөздердің бірі президенттің саяси мәселелер жөніндегі кейбір кеңесшілері бұл жоспарға үзілді-кесілді қарсы болғанын мәлімдеді.
