Вашингтон. 2 тамыз. ИНТЕРФАКС – АҚШ президенті Дональд Трамп Иранға жоспарланған ауқымды әскери соққыларды әзірге жүзеге асырмау туралы шешім қабылдағанын мәлімдеді. Оның айтуынша, ол алға қойған мақсаттарына бейбіт жолмен және қысқа мерзімде қол жеткізуге үміттенеді.
«Әлемдік қауіпсіздік мүддесі үшін және Иранның амандығы мен өркендеуін ескере отырып, жақын арада келісімге қол жеткіземіз деген үмітпен шабуылды тоқтата тұруға келістім», – деп жазды Трамп жексенбі күні Truth Social әлеуметтік желісінде.
Президенттің айтуынша, Иранға соққы жасауды кейінге қалдыруды Тегеранның өзі және Таяу Шығыстағы бірқатар мемлекет сұраған.
Трамптың сөзінше, әңгімелесушілері АҚШ пен Иран арасындағы Ормуз бұғазын ашуды және Иранның ядролық қатеріне нүкте қоюды көздейтін келісімнің негізгі шарттары айқындала бастағанын жеткізген.
«Жұмысқа кірісіп, оны аяқтаңыздар», – деді АҚШ президенті.
Сонымен қатар Трамп егер шабуыл жасау туралы шешім қабылданғанда, оның ауқымы «Екінші дүниежүзілік соғыстан бері әлем көрмеген деңгейде» болатынын айтты.
Бұған дейін америкалық бұқаралық ақпарат құралдары Сауд Арабиясының тақ мұрагері Мұхаммед бен Салман сенбі күні Трампқа Иранға жаппай соққы жасаудың орындылығына күмәнмен қарайтынын жеткізгенін хабарлаған болатын.
Соңғы айларда Трамп бірнеше рет Иран тарапы өзінен әскери соққыларды тоқтатуды сұрағанын мәлімдеген. Алайда Тегеран бұл ақпаратты әр жолы жоққа шығарды.
Ормуз бұғазын ашу және Иранның ядролық қару жасау ниеті жоқ екені жөніндегі кепілдіктер биыл АҚШ пен Иран арасында келісілген өзара түсіністік туралы меморандумда қамтылған болатын. Алайда құжатқа қол қойылғаннан кейін көп ұзамай тараптар бір-біріне қарсы әскери шабуылдарын қайта жалғастырды.
