Астана. 4 тамыз. ИНТЕРФАКС-ҚАЗАҚСТАН – Қазақстан Премьер-министрі Олжас Бектенов «Қазақстанда жасалған» ұлттық бренді аясындағы өнімдерді қолдау және ілгерілетуге арналған кешенді бағдарлама әзірлеуді тапсырды.
«Сауда министрлігі мүдделі мемлекеттік органдармен және “Атамекен” Ұлттық кәсіпкерлер палатасымен бірлесіп, бір ай ішінде “Қазақстанда жасалған” брендімен шығарылатын өнімдерді қолдау және ілгерілету жөніндегі кешенді бағдарламаны әзірлесін», – деді Бектенов сейсенбі күні Астанада өткен Үкімет отырысында.
Сонымен қатар ол бір ай ішінде халық арасында ең көп сұранысқа ие тауар санаттарын айқындап, олардың әрқайсысы бойынша ішкі нарықтағы отандық өнім үлесін ұлғайтуға арналған нақты нысаналы көрсеткіштер белгілеуді тапсырды.
Премьер-министрдің айтуынша, халық тұтынатын тауарларды өндіретін қазақстандық кәсіпорындар көбіне сауда орындарынан орын алуда қиындыққа тап болады. Бұған, ең алдымен, жалдау ақысының қымбаттығы себеп. Мұндай жағдай ішкі нарықтағы отандық өнімнің үлесін арттыруға кедергі келтіріп, оның бәсекеге қабілеттілігіне кері әсер етеді.
«Сауда желілерінің иелері қазақстандық өнімге деген көзқарасын қайта қарауы қажет. Отандық өнімнің есебінен импорттық тауарларға басымдық беру құқықтық тұрғыдан ғана емес, моральдық тұрғыдан да дұрыс емес», – деді Үкімет басшысы.
Ол мемлекеттік органдарға жеңіл өнеркәсіп пен тұрмыстық химия өнімдерін қоса алғанда, барлық санаттағы отандық өндірушілер үшін сауда алаңдарын жалға алудың қолайлы тетіктерін әзірлеуді тапсырды.
Сондай-ақ Мәдениет және ақпарат министрлігіне «Қазақстанда жасалған» ұлттық брендін ілгерілетуге, отандық өнімдерді кеңінен насихаттауға және оларды негізсіз ақпараттық шабуылдардан қорғауға бағытталған бірыңғай ақпараттық науқан ұйымдастыру жүктелді.
