Астана. 20 тамыз. ИНТЕРФАКС-ҚАЗАҚСТАН – Қазақстан Президенті Қасым-Жомарт Тоқаев Үкімет пен мемлекеттік органдарға сирек және сирек жер металдарын қоса алғанда, стратегиялық маңызы бар минералдық шикізат саласын жүйелі түрде дамытуды тапсырды, деп хабарлады Ақорданың баспасөз қызметі.
Тиісті тапсырмалар бейсенбі күні осы саланы дамыту мәселелері қаралған Қауіпсіздік Кеңесінің отырысы қорытындысы бойынша берілді.
Атап айтқанда, саланы реттеу тетіктерін жетілдіру, геологиялық барлау мен өңдеу ісін дамыту, техногендік минералдық түзілімдерді экономикалық айналымға енгізу, зертханалық және кадрлық әлеуетті күшейту, сондай-ақ әкімшілік кедергілерді азайту міндеті қойылды.
Мемлекет басшысы Қазақстанның табиғи қоры мен өндірістік әлеуеті жағынан Орталық Азияда жетекші орын алатынын атап өтіп, осы басымдықты ел мүддесіне тиімді пайдалану қажеттігін айтты.
«Қазіргі әлемдегі жағдай табиғи қоры мол мемлекеттер үшін тиімді, тіпті бірегей мүмкіндік туғызып отыр», – деді Қасым-Жомарт Тоқаев.
Президенттің айтуынша, жоғары технологиялық салалардың дамуы үшін аса маңызды шикізатқа қол жеткізу жолындағы мемлекетаралық бәсеке әлемде күшейіп келеді.
Мемлекет басшысы Қазақстан қолда бар табиғи ресурстар мен өнеркәсіптік мүмкіндіктерді барынша тиімді пайдаланып, осы бағыттағы отандық өндірісті және өнім өндірудің толық тізбегін кезең-кезеңімен қалыптастыруы қажет екенін атап өтті.
Отырыс барысында Үкімет мүшелері саланың қазіргі жағдайы, минералдық қорларды игеру мүмкіндіктері, өңдеу өндірісін дамыту және осы бағыттағы кедергілер туралы баяндады.
Ресми мәлімет бойынша, Қазақстанда сирек және сирек жер элементтерінің 100-ден астам кен орны анықталған. Ел экономика үшін аса маңызды саналатын 34 сирек жер элементінің 19-ын өндіреді. Олардың қатарында электроника, қорғаныс өнеркәсібі, энергетика және телекоммуникация салаларында кеңінен қолданылатын бериллий, тантал, ниобий және рений бар.
