Мәдениет және ақпарат министрлігі хабарлайды: «Астанада Тәуелсіз Мемлекеттер Достастығы волонтерлерінің I форумы басталды. Қазақстан Президенті Қасым-Жомарт Тоқаевтың бастамасымен қолға алынған форум ТМД Үкімет басшылары кеңесінің шешімімен Достастық елдерінің волонтерлік бастамаларын біріктіріп, өзара тәжірибе алмасатын жыл сайынғы алаң ретінде құрылған.
Форумның ашылуында Аида Балаева Мемлекет басшысының құттықтау хатын оқып берді. Президент өз үндеуінде Қазақстанның ұсынысымен БҰҰ жариялаған Халықаралық волонтерлер жылында өтіп отырған бұл жиынның маңызына тоқталды. «Қазақстан бұл форумды өткізуді ұсына отырып, ТМД кеңістігінде тәжірибе алмасуға және волонтерлік бастамаларды халықаралық деңгейде біріктіруге арналған тұрақты алаң қалыптастыруды көздеді. Біз үшін ынтымақ, мейірімділік пен жанашырлық құндылықтарын орнықтырып, халықтар арасындағы достықты нығайту айрықша маңызды. Қазақстанда волонтерлік қызмет адами әлеуетті дамытуға, азаматтық жауапкершілікті арттыруға және қоғамдағы жаңа этикалық ұстанымдарды қалыптастыруға ықпал етеді. 1 шілдеден бастап күшіне енген жаңа Конституцияда еліміздің тарихында алғаш рет волонтерлік қызметті мемлекеттік қолдау жоғары құқықтық деңгейде бекітілді», – делінген құттықтау хатта. Форумның ашылуында сөз сөйлеген Аида Балаева Қазақстанда волонтерлік қозғалысты дамыту жұмыстары жүйелі түрде жүргізіліп келе жатқанын атап өтті».
Еуразия24 пікірі:
Мәдениет және ақпарат министрі Аида Балаеваның волонтерлік бүгінде жай қызығушылық аясынан шығып, адамның бойындағы маңызды дағдыға айналып келе жатқанын айтуы негізсіз емес. Мәселен, 2026 жылы 5–6 маусымда Қазақстан мен Ресейде «Таза өзендер – ортақ іс-қимыл күні» акциясы қатар өтті. Екі елдің волонтерлері, жастар жасақтары, үкіметтік емес ұйымдар мен белсенділер Жайық, Ертіс, Есіл және Тобыл секілді трансшекаралық өзендердің жағалауын тазартуға атсалысты. Жұмыс шекараның екі жағында бір мезгілде жүргізілді. Дүниежүзілік қоршаған ортаны қорғау күніне орай Қазақстанда ұйымдастырылған экологиялық шараларға жалпы саны 3,5 мыңнан астам адам қатысты. Бұл жолғы бастама ресми делегациялардың өзара сапарымен шектелген жоқ. Екі елдің азаматтары өзенге мемлекеттік шекара жүрмейтінін түсініп, ортақ экологиялық мәселені бірге шешуге кірісті. Бұған дейін, ТМД-да Волонтерлік қозғалыс жылы болып жарияланған 2024 жылы да қазақстандық еріктілер Әзербайжан, Армения, Беларусь, Қырғызстан, Ресей, Түрікменстан және Өзбекстан өкілдерімен бірге халықаралық іс-шараларға қатысты. Сол жылдың өзінде Достастық елдерінде жүзден астам акция, кездесу, конференция мен зерттеу ұйымдастырылды. Ташкентте өткен халықаралық волонтерлер форумына Қазақстан делегациясы да қатысып, жиында өзге мәселелермен қатар БҰҰ-ның Орталық Азиядағы волонтерлік қызмет туралы алғашқы шолуы таныстырылды. Бұл – ТМД елдеріндегі волонтерлердің жыл сайын қоғамға ортақ мәселелерді шешуге қосып жүрген үлесінің бір бөлігі ғана. Осы тұрғыдан алғанда, адамдар арасындағы тікелей байланысқа негізделген қоғамдық дипломатия Қасым-Жомарт Тоқаев жиі айтатын елдер арасындағы достық пен өзара түсіністікті нығайтудың пәрменді тетігіне айналып келеді.
