Дубай. 21 тамыз. ИНТЕРФАКС – Ливандағы шииттік «Хезболла» қозғалысы ұйымды Иран Ислам революциясы сақшылар корпусының (ИРСК) «Кудс» арнайы жасағы басқарады деген АҚШ мәлімдемесін жоққа шығарды. Бұл туралы жұма күні LBCI телеарнасы қозғалыс өкілдеріне сілтеме жасап хабарлады.
«Хезболла» өкілдерінің айтуынша, Вашингтон қозғалыс «Кудс» күштерінің бақылауында деген айыптауды оған қарсы енгізілген санкцияларды негіздеу үшін пайдаланып отыр.
Сонымен қатар қозғалыс өкілдері Тегеранмен тығыз байланысы бар екенін жасырмайтынын айтып, АҚШ-тың мұндай қарым-қатынасқа араласуға құқығы жоқ екенін мәлімдеді.
«Хезболла» Вашингтон қозғалыстың өзіне ғана емес, оны қолдайтын тараптарға да саяси, қаржылық және әскери қысым жасап отырғанын алға тартты. Ұйым өкілдерінің пікірінше, мұндай саясат Израильдің мүддесіне сай келеді әрі оның Ливанның оңтүстігіндегі ықпалын күшейтіп, аймақтағы мақсатын жүзеге асыруға бағытталған.
Қозғалыс АҚШ-ты Ливанға қысым жасаудың орнына Израильден елдің оңтүстігіндегі әскерін әкетуді және Ливан аумағына соққы беруді тоқтатуды талап етуге шақырды.
Бейсенбі күні АҚШ Қаржы министрлігі «Хезболла» Иран билігінің мүддесіне қызмет ететінін және ИРСК-ның «Кудс» күштеріне бағынатынын мәлімдеді. Сонымен бірге Вашингтон қозғалысқа қолма-қол ақша жеткізумен айналысқан желіге қатысы бар деген он адамға санкция енгізді.
АҚШ тарапының мәліметінше, аталған желі курьерлердің көмегімен миллиондаған доллар тасымалдаған. Олар Ливан, Түркия, БАӘ және Иран арасында тұрақты жолаушылар рейстерімен қатынап, «Хезболланы» шетел валютасымен қамтамасыз етуге және санкциялық шектеулерді айналып өтуге көмектескен.
