Нью-Йорк. 21 тамыз. ИНТЕРФАКС – Hyundai Motor қызметкерлері жұма күні 2016 жылдан бері алғаш рет бір күндік жаппай ереуіл өткізді. Олар жалақыны көтеруді және өндіріске жаңа технологиялар енгізілген жағдайда жұмыс орындарының сақталуына кепілдік беруді талап етіп отыр.
The Wall Street Journal мәліметінше, кәсіподақтың ондаған мың мүшесі қатысқан ереуіл кезінде Hyundai Motor мен Kia зауыттарындағы өндіріс толық тоқтады. Қызметкерлердің бір бөлігі Сеулде өткен митингіге де қатысты.
Бұған дейін оңтүстіккореялық автоконцерн қызметкерлері бірнеше рет қысқа мерзімді ереуіл ұйымдастырып, жұмыс ауысымын белгіленген уақыттан бірнеше сағат бұрын аяқтап жүрген. Наразылық шаралары келесі аптада да жалғасады деп жоспарланған.
Компания ереуілдің салдары туралы нақты мәлімет жариялаған жоқ. Ал Yonhap агенттігінің есебінше, өндірістің тоқтауынан келген шығын 2,3 трлн воннан, яғни 1,65 млрд доллардан асқан.
«Наразылық шаралары клиенттерімізге, серіктестерімізге және компания жұмысына әсер етуі мүмкін. Қазір автомобиль индустриясы жаңа технологияларға бет бұрған шешуші кезеңде тұр. Бұл өзгеріске табысты бейімделу үшін екі тарап та бірлесіп әрекет етуі қажет. Hyundai мәселені келіссөз арқылы шешуге дайын», – делінген компания мәлімдемесінде.
Компания басшылығы мен кәсіподақ өкілдері келіссөздердің қазіргі барысы және тараптардың ұстанымы туралы әзірге толық мәлімет берген жоқ.
Кәсіподақ негізгі жалақы мен сыйақы мөлшерін көбейтуді, сондай-ақ міндетті зейнетке шығу жасын қазіргі 60 жастан кемінде 65 жасқа дейін ұзартуды талап етіп отыр. Қызметкерлерді компанияның өндірісте роботтар мен жасанды интеллектіні кеңінен пайдалану жоспары да алаңдатады. Осыған байланысты олар жұмыс орындарын сақтауға кепілдік берілуін талап етуде.
Жұма күнгі сауда қорытындысында Hyundai Motor акциялары 0,6%-ға арзандады. Ал жыл басынан бері компания акцияларының құны шамамен 40%-ға өскен.
