Павлодар зауытындағы жанармай сапасына қатысты түйткілді АМӨЗ арқылы шешу ұсынылғаны сол еді, Атыраудағы зауыттың өзінде өрт шықты .
«Атырау мұнай өңдеу зауытындағы өрт сөндірілді. Өртті сөндіруге ТЖМ, «Семсер өрт сөндіруші», АТМА әуежайы және NCOC компаниясының апаттық-құтқару қызметінен 65-ке жуық адам мен 19 техника жұмылдырылды. Оқиға орнында жедел штаб жұмыс істеп, барлық күш пен техниканың іс-қимылы үйлестірілді. Сағат 13:42-де өрт оқшауланып, оның әрі қарай таралуына жол берілмеді. Қазір өрт толық сөндірілді. Зардап шеккендер жоқ. Өрттің шығу себебі анықталып жатыр», – деп хабарлады Zakon.kz .
Айта кетейік, АМӨЗ-де бұған дейін де жоспардан тыс тоқтау мен өндірістегі түрлі ақау бірнеше рет тіркелген. Осы себепті зауыттың тұрақты жұмыс істеуі мұнай өңдеу саласындағы маңызды мәселелердің бірі болып отыр. Қазіргі жағдайда оның жұмысының уақытша тоқтауының өзі ішкі нарықты жанармаймен қамтамасыз етуге қосымша салмақ түсіруі мүмкін.
Оның үстіне елдің батысынан шығыс және солтүстік өңірлерге жанар-жағармай жеткізу оңай емес. Мұнда «Қазақстан темір жолының» тасымал мүмкіндігі, қажетті цистерналардың болуы және жүкті уақытында жеткізу мәселесі маңызды. Егер өрт салдарынан Атырау зауыты өнім жөнелтуді азайтса, Павлодар өңірін жанармаймен қамтамасыз ету одан әрі қиындауы ықтимал.
Әзірге нақты қорытынды жасауға ерте. Құзырлы органдар ықтимал тәуекелдердің алдын алу жолдарын қарастырып жатқаны сөзсіз. Бірақ жанармай нарығындағы соңғы оқиғалардың осылайша бірінен соң бірі орын алуы көңілге күдік ұялатады.
