БЕЙЖІҢ. 9 қыркүйек. ИНТЕРФАКС — Солтүстік Кореяның жоғары лауазымды партия және үкімет өкілдері КХДР-дың құрылған күніне орай елдің бұрынғы басшылары жерленген кесенеге барды. Бұл туралы Кореяның орталық телеграф агенттігі (КЦТА) хабарлады.
Бір күн бұрын шенеуніктер Пхеньяндағы Кымсусан Күн сарайына барып, мемлекет негізін қалаған Ким Ир Сен мен оның ұлы Ким Чен Ирдің рухына тағзым етті. Олардың бальзамдалған денелері осы сарайда сақтаулы.
«Қатысушылар олардың рухына тағзым етіп, есімдерінің мәңгі жасай беруін тіледі», — делінген хабарламада.
Сондай-ақ олар «Отанның өркендеуі мен халықтың бақыты үшін» бұрынғыдан да аянбай еңбек етуге серт берген.
Ким Чен Ын бұл шараға қатысқан жоқ. Алайда марқұм екі басшының ескерткішіне оның атынан гүл себеті қойылды.
Солтүстік Кореяның бұқаралық ақпарат құралдарының хабарлауынша, КХДР Министрлер кабинетінің төрағасы Пак Тхэ Сон мен Жоғары халық жиналысы президиумының төрағасы Чо Ен Вон бастаған бірқатар жоғары лауазымды тұлға елдегі ұлттық зираттарға да барған.
КХДР-да 9 қыркүйек Республика күні ретінде аталып өтеді. 1948 жылы дәл осы күні тәуелсіз социалистік мемлекет құрылғаны жарияланған.
Мерекеге орай Ким Чен Ынға бірқатар елдің басшыларынан құттықтау келіп түсті. Ресей президенті Владимир Путин де КХДР-дың құрылғанына 78 жыл толуымен құттықтады.
«Өткен жылдар ішінде еліңіз әлеуметтік және экономикалық салаларда елеулі табыстарға жетіп, әлемдік аренадағы орнын айтарлықтай нығайтты», — деді Путин.
Оның айтуынша, Мәскеу мен Пхеньян екі ел арасындағы жан-жақты стратегиялық әріптестікті одан әрі нығайту бағытындағы бірлескен жұмысты жалғастырады.
Ресей президенті мұның екі ел халқының мүддесіне сай келетінін, сондай-ақ өңірлік қауіпсіздікті қамтамасыз етуге және әділетті әрі көпполярлы әлемдік тәртіп қалыптастыруға ықпал ететінін атап өтті.
Ресей Қауіпсіздік кеңесі төрағасының орынбасары, «Единая Россия» партиясының төрағасы Дмитрий Медведев те КХДР басшысын құттықтады.
«Қазіргі геосаяси сын-қатерлер жағдайында мемлекеттеріміздің «ұжымдық Батыстың» неоколониалдық бағытына қарсы тұрып, әділетті әлемдік тәртіп орнату жолында бірлесе әрекет етіп отырғаны қуантады. Екі ел өңірлік және халықаралық күн тәртібіндегі негізгі мәселелер бойынша ортақ ұстанымда», — деді ол.
Медведев Ресей мен КХДР халықтарының игілігі үшін көпполярлы ынтымақтастықтың одан әрі нығаятынына үміт білдірді.
Қытай төрағасы Си Цзиньпин өз кезегінде ҚХР мен КХДР-ды «бір-бірін қолдап, өзара көмектесетін және тағдыры ортақ достас социалистік көрші мемлекеттер» деп атады.
«Қытай мен Корея арасындағы қарым-қатынасты сақтау, нығайту және дамыту — Қытай партиясы мен үкіметінің тұрақты әрі өзгермейтін бағыты», — деді Си Цзиньпин.
