АСТАНА. 9 қыркүйек. ИНТЕРФАКС-ҚАЗАҚСТАН — Президент Қасым-Жомарт Тоқаев «Самұрық-Қазына» қорының биылғы жұмыс нәтижелері, негізгі өндірістік және қаржылық көрсеткіштері, сондай-ақ ірі инфрақұрылымдық жобалардың жүзеге асырылу барысы жөніндегі есепті тыңдады. Бұл туралы Ақорда хабарлады.
«Самұрық-Қазына» АҚ басқарма төрағасы Нұрлан Жақыповтың айтуынша, 2026 жылы жалпы құны 3,2 трлн теңге болатын бірқатар инвестициялық жобаны аяқтау жоспарланған. Олардың қатарында Мойынты – Қызылжар және Дарбаза – Мақтаарал теміржол желілерінің құрылысы, Алтынкөл – Жетіген және Бейнеу – Маңғыстау теміржол учаскелерін жаңғырту бар.
Сондай-ақ Қашаған кен орнында газ өңдеу зауыты салынып, Алматыдағы ЖЭО-2 жаңғыртылады. Түркістан облысында бу-газ қондырғысы мен гибридті электр станциясының құрылысы жүргізіліп жатыр.
Бұдан бөлек, Астанадағы деректерді өңдеу орталығының құрылысы мен Каспий теңізінің табаны арқылы талшықты-оптикалық байланыс желісін тарту жұмыстары аяқталуға жақын.
Кездесуде қордың алдағы инвестициялық жоспарлары да таныстырылды. 2027–2029 жылдары энергетика, мұнай-газ саласы, көлік және цифрлық инфрақұрылым бағыттарында жалпы құны 21 трлн теңге болатын 38 жобаны жүзеге асыру көзделген.
Нұрлан Жақыпов әлеуметтік жобалардың орындалу барысына да тоқталды. Басым бағыттардың қатарында медициналық және әлеуметтік нысандар салу, мүгедектігі бар балаларға арналған 55 орталық пен 46 инклюзия кабинетін ашу, сондай-ақ спорт және білім беру инфрақұрылымын дамыту бар.
Кездесу қорытындысында Қасым-Жомарт Тоқаев «Самұрық-Қазына» қоры жұмысының негізгі бағыттары бойынша бірқатар тапсырма берді.
«Самұрық-Қазына» қоры Қазақстанның мұнай-газ, көлік-логистика және энергетика салаларындағы ірі стратегиялық активтерін басқарады.
9 қыркүйектегі ресми бағам — $1 үшін 454,46 теңге.
