Астана. 16 қыркүйек. ИНТЕРФАКС-ҚАЗАҚСТАН – Сыртқы істер министрі Мұхтар Тілеуберді бастаған Қазақстан делегациясы Нью-Йоркте өтетін БҰҰ Бас Ассамблеясының 81-сессиясы жоғары деңгейдегі апталығына қатысады. Бұл туралы Сыртқы істер министрлігінің ресми өкілі Жанболат Үсенов мәлімдеді.
«Қазақстан үшін жоғары деңгейдегі апта – ұлттық және өңірлік бастамаларды ілгерілетуге, екіжақты байланыстарды нығайтуға және жаһандық күн тәртібіндегі өзекті мәселелер бойынша ортақ шешімдер әзірлеуге мүмкіндік беретін маңызды алаң. Қазақстан делегациясын Сыртқы істер министрі Мұхтар Тілеуберді басқарады», – деді Үсенов сәрсенбі күні СІМ-де өткен брифингте.
Оның айтуынша, сапар бағдарламасы аясында Мұхтар Тілеуберді Бас Ассамблеяның жалпы пікірталасында сөз сөйлеп, БҰҰ Бас хатшысы Антониу Гутерришпен кездеседі. Сондай-ақ бірқатар елдің сыртқы саяси ведомство басшыларымен, халықаралық ұйымдардың жетекшілерімен және шетелдік бизнес өкілдерімен екіжақты кездесулер өткізеді.
«Қазақстан делегациясы өңірлік ұйымдар мен көпжақты бірлестіктердің бейресми отырыстарына, Бас Ассамблея аясындағы іс-шараларға, сондай-ақ Орталық Азия елдері сыртқы істер министрлерінің консультацияларына қатысады», – деді Үсенов.
БҰҰ Бас Ассамблеясының 81-сессиясы аясындағы жоғары деңгейдегі апта Нью-Йоркте 22–28 қыркүйек аралығында өтеді.
Сессияның тақырыбы – сенімді қалпына келтіру, өзгерістерді басқару және БҰҰ қызметін баршаға тиімді ету. Кездесулерде бейбітшілік пен қауіпсіздықты сақтау, Тұрақты даму мақсаттарына қол жеткізуді жеделдету, климаттың өзгеруіне қарсы іс-қимыл және қоршаған ортаны қорғау, адам құқықтары, жасанды интеллект секілді жаңа технологияларды реттеу, сондай-ақ БҰҰ-ны реформалау мәселелері талқыланады.
