КазТАГ хабарлайды: «Жол қозғалысы ережелерін үнемі бұзатын жүргізушілерге айыппұл төлеу кезінде жеңілдік берілмеуге тиіс. Қазақстан Республикасының Премьер-министрі Олжас Бектенов осындай пікір білдірді. «Жалпы, жол қозғалысы ережелерін үнемі бұзатын жүргізушілерге қатысты тәсілді қайта қарау қажет. Мұндай адамдарға айыппұл төлеу кезінде жеңілдік берілмеуге тиіс. Керісінше, айыппұл мөлшері ереже бұзу санына қарай бірнеше есе артуы керек», – деді Бектенов сейсенбі күні өткен Үкімет отырысында. Ішкі істер вице-министрі Игорь Лепеханың айтуынша, ІІМ жүргізушілерді айыппұл төлеу жеңілдігінен айыратын нақты өлшемдерді әзірге анықтаған жоқ. «Кез келген азамат абайсызда жол ережесін бір немесе екі рет бұзуы мүмкін. Бірақ ережені тұрақты түрде бұзатын, айыппұлдарының жалпы сомасы миллион теңгеден асатын адамдар да бар. Сондықтан белгілі бір шек болуы керек. Мәселен, бір жыл ішінде 10 рет ереже бұзу немесе бес рет өрескел тәртіп бұзу дегендей. Осы шектен асқаннан кейін жеңілдік берілмеуі тиіс. Бізде бір жылда 50 айыппұл төлейтін адамдар бар. Оның үстіне, олар айыппұлдарын бір-екі күннің ішінде уақытылы төлеп отырады», – деді Лепеха БАҚ өкілдеріне арналған брифингте».
Еуразия24 пікірі:
Олжас Бектеновтің жол қозғалысы ережелерін жүйелі түрде бұзатын жүргізушілерге жазаны күшейту туралы бастамасын ІІМ-нің қолдауы құптарлық. Өйткені ведомство мамандары көлік қозғалысы тығыз ірі қалаларда камера алдында жол ережесін абайсызда бұзып алу мүмкін екенін жақсы біледі. Мәселен, тұтас жолақ сызығының үстіндегі айналып өтуге келмейтін кедергіден өту кезінде осындай жағдай болуы ықтимал.
Дегенмен жол қозғалысы ережелерін бұзудың барлық түрін бір санатқа жатқызбаған жөн. Жүргізушінің қауіпті маневр жасап, жылдамдықты асырып, агрессивті көлік жүргізу арқылы жол қозғалысының өзге қатысушыларына үнемі қауіп төндіруі – бір басқа. Ал жол-көлік оқиғасына қауіп төндірмеген формалды тәртіп бұзушылық – мүлде басқа жағдай. Сондықтан ІІМ өкілі айтқан «жылына бес немесе он айыппұл» деген өлшемнің өзі тым біржақты болуы мүмкін.
Мүмкін, бірнеше көрсеткішті қатар ескеретін тәсіл қарастырған дұрыс шығар? Яғни тәртіп бұзушылықтардың санымен ғана шектелмей, салынған айыппұлдардың мөлшерін, құқық бұзушылықтың сипатын және оның қайталану жиілігін де есепке алуға болады. ІІМ қандай шешім ұсынатынын уақыт көрсетеді. Дегенмен Үкіметтің тапсырмасын ескерсек, бұл мәселе бойынша нақты ұсыныстар әзірленетіні анық.
