Астана. 23 қыркүйек. ИНТЕРФАКС-ҚАЗАҚСТАН – Сыртқы істер министрі Мұхтар Тілеуберді бастаған Қазақстан делегациясы БҰҰ Бас Ассамблеясының 81-сессиясы аясындағы жоғары деңгейлі апталыққа қатысып жатыр, деп хабарлады СІМ баспасөз қызметі сәрсенбіге қараған түні.
Министр БҰҰ Бас Ассамблеясының жалпы саяси пікірталасында сөз сөйлеп, халықаралық күн тәртібіндегі өзекті мәселелерді шешуге қатысты Қазақстанның ұстанымын және көпжақты ынтымақтастықты нығайту жөніндегі көзқарасын таныстырады.
Сондай-ақ жаһандық өзгерістер жағдайындағы жасампаз даму мәселесіне жеке тоқталады. Атап айтқанда, Қазақстанның экологиялық жауапкершілік мәдениетін қалыптастыру, волонтерлікті дамыту, заң үстемдігі мен ынтымақтастық қағидаттарын нығайту, сондай-ақ қоғам бірлігін арттыру бағытындағы тәжірибесі таныстырылады.
Жоғары деңгейлі апталық аясында Қазақстан делегациясы БҰҰ басшылығымен және оның агенттіктерінің жетекшілерімен, ЕҚЫҰ, Халықаралық Қызыл Крест комитеті және басқа да халықаралық ұйымдардың өкілдерімен кездеседі.
Сонымен қатар Армения, Әзербайжан, Венгрия, Иордания, Канада, Кипр, Кувейт, Молдова, Польша, Ресей, Словения, Украина, Швейцария және Сальвадор сыртқы істер министрлерімен екіжақты кездесулер өткізу жоспарланған.
Қазақстан делегациясы Ислам ынтымақтастығы ұйымы (ИЫҰ), Ұжымдық қауіпсіздік туралы шарт ұйымы (ҰҚШҰ) және Түркі мемлекеттері ұйымына (ТМҰ) мүше елдер сыртқы істер министрлерінің кездесулеріне де қатысады. Бұдан бөлек, теңізге шығатын жолы жоқ дамушы мемлекеттер мен БҰҰ Өркениеттер альянсының Достар тобы аясындағы жиындарға, сондай-ақ транзиттік-көліктік ынтымақтастық пен инвестиция, экология және цифрландыру мәселелеріне арналған тақырыптық іс-шараларға қатысу көзделген.
