Вашингтон. 10 қазан. ИНТЕРФАКС – АҚШ Президенті Дональд Трамп Украина Президенті Владимир Зеленский Вашингтонның Ресейдің мұнай өңдеу зауыттарына шабуылды тоқтату жөніндегі бірнеше мәрте жасаған өтінішіне құлақ аспағаннан кейін Ресеймен дизель отынын жеткізу туралы келісім жасасуға шешім қабылдады. Бұл туралы жағдайдан тікелей хабардар америкалық шенеунік Axios басылымына мәлімдеді.
Axios дереккөзінің айтуынша, «Трамп Украинадан Ресейдің мұнай өңдеу зауыттарына жасалатын шабуылдарды біржақты тоқтатуды талап еткен. Өйткені мұндай соққылар АҚШ-та бензин бағасының өсуіне әсер етіп отыр».
«Украина АҚШ-тың Ресей мұнай өңдеу зауыттарына соққыны тоқтату туралы бірнеше мәрте жасаған өтінішін елемегеннен кейін Трамп бұл келісімді жүзеге асыруға кірісуге шешім қабылдады», – деп хабарлады басылым.
Axios дереккөздерінің мәліметінше, АҚШ өкілдері Стив Уиткофф пен Джаред Кушнердің бір күн бұрын Украина тарапымен өткізген келіссөзінде Киев Трамптың өтінішіне құлақ аспаса, Вашингтон барлау деректерін беруді тоқтатуы мүмкін екені де айтылған.
Трамп бір күн бұрын Ресей Президенті Владимир Путинмен нәтижелі әңгіме өткізгенін мәлімдеді. Келіссөз барысында Ресейден АҚШ пен халықаралық нарықтарға дизель отынын жеткізу мәселесі талқыланған.
АҚШ Қаржы министрлігінің Шетелдік активтерді бақылау басқармасы (OFAC) Трамптың тапсырмасымен Ресей дизель отынын әлемдік нарыққа жеткізуге уақытша рұқсат беретін бас лицензия шығарды.
OFAC құжаты Ресейде өндірілген дизель отынын сатуға, жеткізуге, түсіруге және импорттауға, соның ішінде АҚШ-қа әкелуге байланысты операцияларды 2027 жылғы 7 сәуірге дейін уақытша жүргізуге мүмкіндік береді.
