Астана. 12 қазан. ИНТЕРФАКС-ҚАЗАҚСТАН – Қазақстан Президенті Қасым-Жомарт Тоқаев барлық деңгейдегі мәслихаттардың өкілеттігін мерзімінен бұрын тоқтату мәселесін Премьер-министр Олжас Бектеновпен және Құрылтай төрағасы Айбек Дәдебаймен талқылады. Бұл туралы Мемлекет басшысының баспасөз қызметі хабарлады.
«Мемлекет басшысы барлық деңгейдегі мәслихаттардың өкілеттігін мерзімінен бұрын тоқтату мәселесі бойынша Премьер-министрмен және Құрылтай төрағасымен кеңес өткізді», – делінген хабарламада.
Кездесу барысында Президент азаматтардың заңды мүдделерін қорғауда, жергілікті бюджеттерді бекітуде және өңірлердің дамуын бақылауда мәслихаттардың тиімді жұмыс істеуі аса маңызды екенін атап өтті.
Қасым-Жомарт Тоқаев депутаттар құрамының жаңаруы жергілікті өкілді органдардың жұмысын едәуір жандандыратынына сенім білдірді.
Қазақстан Республикасы Конституциясының 88-бабы 5-тармағына сәйкес өткен кеңесте Олжас Бектенов пен Айбек Дәдебай қаралып отырған мәселеге қатысты өз ұсыныстарын ортаға салды.
Кездесу қорытындысында Мемлекет басшысы айтылған пікірлерді ескере отырып, Конституция талаптарына сай түпкілікті шешім қабылдайтынын жеткізді.
Бұған дейін, 24 қыркүйекте Халық кеңесінің алғашқы сессиясында Қасым-Жомарт Тоқаев барлық деңгейдегі мәслихаттардың өкілеттігін мерзімінен бұрын тоқтату ниеті бар екенін мәлімдеген болатын.
«Жақын арада барлық деңгейдегі мәслихаттардың өкілеттігін мерзімінен бұрын тоқтату мәселесі бойынша Премьер-министрмен және Құрылтай төрағасымен кеңес өткіземін. Соның қорытындысында тиісті жарлыққа қол қоямын», – деген еді Президент.
Ол жарлыққа қол қойылғаннан кейін Орталық сайлау комиссиясы алдағы сайлаудың күнін белгілейтінін нақтылады.
Мемлекет басшысы мәслихат депутаттарының құрамын жаңарту қажеттігін елдегі партиялық жүйеде болған өзгерістермен де байланыстырды.
Президенттің айтуынша, мәслихат депутаттарының басым көпшілігі «Әділет» партиясына қосылған Amanat партиясының атынан сайланған.
«Құқықтық рәсімдер жақын арада аяқталады. Осыдан кейін мәслихат депутаттарының басым бөлігінің заңды өкілеттігіне қатысты мәселе туындайды», – деді сол кезде Мемлекет басшысы.
Қасым-Жомарт Тоқаев алдағы мәслихат сайлауын Қазақстанның мемлекеттік басқару жүйесін ауқымды жаңғырту жолындағы соңғы кезең деп атады.
