Қаржылық мониторинг агенттігі заңды кәсіпкерлік қызметті бүркемелеп, электрондық терминалдар арқылы 188 млрд теңгеден астам қаржы айналымын жүзеге асырған сегіз адамнан тұратын топқа қатысты қылмыстық істің сотқа жолданғанын хабарлады.
«Іс материалдарына сәйкес, заңсыз қызмет «Nomadgames», «Sultangames» интернет-ресурстары және олардың балама сайттары арқылы жүргізілген. Ойыншылардан ақша қабылдау үшін төлем ұйымдары, банктік эквайринг, POS-терминалдар мен интернет-терминалдар, электрондық әмияндар және криптовалюта құралдары қамтылған көпдеңгейлі төлем жүйесі пайдаланылған.
Аталған схемаға банк секторының өкілдері де қатысқан. Олар төлем жүйесіне қосылуды қамтамасыз етіп, міндетті тексерусіз шарттар жасасуға және интернет-терминалдарға тиісті MCC-кодтарын беруге ықпал еткен.
Қаржы операцияларының нақты мақсатын жасыру үшін төлемдер заңды букмекерлік қызмет пен өзге де кәсіпкерлік қызмет түрлері ретінде рәсімделген.
Қылмыстық жолмен алынған кірістерді заңдастыру үшін күдіктілердің бақылауындағы ЖШС пайдаланылған. Жалған шарт негізінде аталған серіктестіктің шоттарына 10 млрд теңге аударылған», – делінген Қаржылық мониторинг агенттігінің хабарламасында.
Сонымен қатар тергеу барысында терминалдар арқылы өткен қаражаттың криптовалютаға айырбасталып, күдіктілердің криптовалюталық әмияндарына аударылғаны анықталды. Аударылған цифрлық активтердің жалпы құны 19 млн АҚШ долларын құраған.
Күдіктілердің үшеуі қамауға алынса, тағы үшеуі кепілмен босатылған. Қалған екеуіне ешқайда кетпеу туралы қолхат беру түріндегі бұлтартпау шарасы қолданылған. Қылмыстық іс Астана қаласының сотында қаралады.
Бұл істе заңсыз ойын бизнесінің ауқымынан гөрі оны ұйымдастырушылардың заңды банк жүйесін пайдаланып, заңсыз табыс табу тәсілдері ерекше қызығушылық тудырады.
Мұның бәрі банк секторы күмәнді операцияларды анықтау мен бақылаудың көпсатылы жүйесін қалыптастырған кезеңде орын алған. Алайда тергеу мәліметіне сәйкес, бір ғана топтың заңсыз операцияларының көлемі 188 млрд теңгеге жеткенін ескерсек, бұл жүйенің іс жүзінде қаншалықты тиімді жұмыс істейтіні жөнінде сұрақ туындайды.
Егер банк тексерулерін дұрыс рәсімделмеген шарттар мен төлемдердің нақты мақсатын жасыру арқылы айналып өту мүмкін болса, мәселе заңсыз интернет-казинолардың қызметімен ғана шектелмейді. Мұндай олқылықтар басқа да заңсыз қаржылық схемаларда пайдаланылуы мүмкін.
Әзірге аталған іске қатысы бар банктердің атауы көпшілікке белгісіз. Олардың қай банктер екені сот талқылауы барысында анықталуы мүмкін. Дегенмен бұл жағдай қаржы нарығын реттеуші орган – Қаржы нарығын реттеу және дамыту агенттігінің осындай заңсыз схемаларды анықтау мақсатында жеке тексеру жүргізуіне жеткілікті негіз бола алады.
