Астана. 21 шілде. ИНТЕРФАКС-ҚАЗАҚСТАН – Қазақстан Президенті Қасым-Жомарт Тоқаев Қазақстан мен Қырғыз Республикасы арасындағы одақтастық қатынастарды тереңдету және кеңейту туралы шартты ратификациялау жөніндегі заңға қол қойды. Бұл туралы Мемлекет басшысының баспасөз қызметі хабарлады.
Аталған заң өзара тиімді ынтымақтастықты кеңейтуге және екі ел арасындағы саяси, әскери, сауда-экономикалық, инвестициялық, ауылшаруашылығы, көлік-транзит, су-энергетика, білім беру, ғылыми-техникалық, мәдени-гуманитарлық салалардағы кешенді әріптестікті дамытуға бағытталған.
Құжатта тараптар парламенттер арасындағы байланыстарды, оның ішінде Ынтымақтастық жөніндегі парламентаралық кеңес аясындағы өзара іс-қимылды одан әрі дамытып, нығайтуға ниетті екені көрсетілген.
Сонымен қатар, тараптар қауіпсіздік саласындағы жаңа сын-қатерлер мен қауіптерге бірлесе қарсы тұру бағытында ынтымақтастықты кеңейтіп, тереңдете түсуге келісті. Атап айтқанда, терроризмге, экстремизмге, сепаратизмге, трансұлттық ұйымдасқан қылмысқа, киберқылмысқа, заңсызкөші-қонға, адам саудасына, қару-жарақтың, есірткі құралдарының, психотроптық заттар мен олардың прекурсорларының заңсыз айналымына қарсы күресте өзара іс-қимыл жалғасатын болады.
