Берлин, 29 шілде. ИНТЕРФАКС – Германия халқының басым бөлігі – 74%-ы Газа секторындағы гуманитарлық жағдайдың ушығуына байланысты Берлин тарапынан Израильге дипломатиялық қысымды арттыруды қолдайды. Бұл туралы неміс басылымдарында жарияланған қоғамдық пікірді зерттеу нәтижелері көрсетіп отыр.
Сауалнамаға қатысқан азаматтардың көзқарасы олардың саяси ұстанымына байланысты ерекшеленеді. Мәселен, Германиядағы Солшылдар партиясының жақтастарының 94%-ы және «Жасылдар» партиясын қолдайтындардың 88%-ы үкімет Израильге қатысты қатаң ұстаным ұстануы тиіс деп есептейді.
Христиан-демократиялық одақ (ХДО), Христиан-әлеуметтік одақ (ХӘО) және Социал-демократиялық партия (СДПГ) өкілдерінен құралған үкімет коалициясының жақтастары арасында бұл пікірмен келісетіндердің үлесі – 77%.
«Германия үшін альтернатива» атты оңшыл партияны қолдайтын респонденттердің арасында бұл мәселеге қатысты пікір екіге жарылған: 61%-ы Израильге қысымды күшейтуді қолдаса, 37%-ы қарсы, ал 2%-ы жауап беруден бас тартқан.
Сауалнаманы 24–25 шілде күндері «Штерн» журналының тапсырысы бойынша Forsa зерттеу компаниясы жүргізген. Барлығы 1001 адам қатысқан.
Айта кетейік, бұған дейін бірқатар неміс ақпарат құралдары Германия үкіметінің Газа секторындағы гуманитарлық дағдарысты шешу мақсатында Израильге қысым жасауға дайын екенін хабарлаған еді. Алайда аталған қадамдардың нақты қандай болатыны жарияланбаған.
