АСТАНА. 5 тамыз. ИНТЕРФАКС-ҚАЗАҚСТАН – Қазақстан Президенті Қасым-Жомарт Тоқаев теңізге шыға алмайтын дамушы елдерге (ТШДЕ) көрсетілетін қолдауды күшейтуге шақырды.
Мемлекет басшысының айтуынша, қазіргі таңда теңізге тікелей шығу мүмкіндігі жоқ 32 дамушы елде жарты миллиардтан астам адам өмір сүреді. Аталған елдер қаржыландыру, технологиялар және жаһандық нарықтарға қол жеткізу мәселелерінде әлі де елеулі қиындықтарға тап болуда.
«Теңізге шыға алмайтын елдер үшін өңіраралық көлік байланысының шектеулі болуы әлі де негізгі мәселе болып отыр. Бұл өз кезегінде транзит пен сауда шығындарының жоғары болуына, сондай-ақ геосаяси факторларға тәуелділіктің артуына алып келеді. Мұндай шектеулер халықтың әл-ауқатына кері әсерін тигізіп, елдердің бәсекеге қабілеттілігін төмендетуде. Сонымен қатар, бұл қиындықтар қақтығыстармен, экономикалық санкциялармен, жеткізу тізбегіндегі үзілістермен және жаһандық сенім дағдарысымен одан әрі ушыға түсуде», – деді Президент БҰҰ-ның теңізге шыға алмайтын дамушы елдерге арналған үшінші конференциясында (Аваза, Түрікменстан).
Сонымен бірге Қ.Тоқаевтың пікірінше, ТШДЕ елдері жаһандық күн тәртібін қалыптастыруда тең құқылы әрі әлеуетті серіктестер ретінде қарастырылуы тиіс.
Президент Қазақстанның Аваза іс-қимыл бағдарламасын орнықты, инклюзивті және тұрақты болашаққа апаратын жол картасы ретінде толық қолдайтынын атап өтті.
«Бұл маңызды бастама транзиттік елдер, халықаралық даму ұйымдары мен қаржы институттарының саяси қолдауына ие болуы керек. Транспорт, энергетика және цифрлық инфрақұрылым сынды басым секторларға инвестиция тарту үшін инновациялық қаржылық тетіктер қажет», – деп түйіндеді Мемлекет басшысы.
