ЛОНДОН. 9 тамыз. ИНТЕРФАКС – Financial Times газетінің хабарлауынша, Бразилияның саяси және іскер топтары АҚШ тарапынан қосымша кедендік шектеулер енгізілу ықтималдығына алаңдаулы. Бұл қауіп Бразилияның Ресейден дизель отыны мен минералдық тыңайтқышты ірі көлемде импорттауына байланысты туындап отыр.
Бразилия Мұнай өнімдерін импорттаушылар қауымдастығының (Abicom) президенті Сержиу Араужу басылымға берген сұхбатында:
«Ресей – біз үшін дизель отынының негізгі жеткізушісі, оған тәуелділігіміз жоғары», – деп атап өтті.
Басылымның дерегінше, АҚШ президенті Дональд Трамп Үндістанға ресейлік мұнай импортына байланысты қосымша кедендік тариф енгізіп, өз әкімшілігіне Мәскеуден мұнай өнімдерін сатып алып отырған өзге мемлекеттердің саудасын қадағалауды тапсырған. Сарапшылардың пікірінше, бұл тізімде Бразилияның да болуы әбден мүмкін.
Сонымен бірге, Бразилия саяси ортасының өкілдері Ресеймен конструктивті экономикалық байланыстарды сақтау маңыздылығын алға тартады.
Financial Times деректеріне сәйкес, Украинадағы қақтығыс басталғаннан бері Бразилия – БРИКС аясындағы серіктесі Ресеймен өзара сауда көлемін үш есеге ұлғайтқан. 2024 жылы бұл көрсеткіш 12,4 млрд АҚШ долларына жетті. Қазіргі таңда Бразилия Ресей дизель отынының көлемі бойынша Түркиядан кейінгі екінші ірі импорттаушы саналады.
Бұған дейін Associated Press агенттігі Бразилия үкіметіндегі дереккөздерге сілтеме жасап, елдің Дүниежүзілік сауда ұйымынан (ДСҰ) АҚШ енгізген тарифтер мәселесін талқылау үшін консультация өткізуді сұрағанын хабарлаған.
30 шілдеде Дональд Трамп Бразилиядан экспортталатын тауарларға қосымша 40 пайыздық ad valorem баж салығын енгізу туралы шешім қабылдады. Осылайша, жаңа мөлшерлемелерді қоса есептегенде, елге қолданылатын жалпы тариф деңгейі 50 пайызға жетті.
АҚШ президенті бұл қадамды Бразилияда бұрынғы мемлекет басшысы Жаир Болсонаруға қатысты жүргізіліп жатқан сот істерімен де байланыстырды. Ол Болсонаруды өзінің саяси одақтасы деп атап, егер қазіргі билік бұл істерді тоқтатпаса, Бразилияға қарсы шаралар қабылданатынын бірнеше мәрте ескерткен.
