АСТАНА. 10 тамыз. ИНТЕРФАКС-ҚАЗАҚСТАН – Қазақстан Президенті Қасым-Жомарт Тоқаев қазақ халқының ұлы ойшылы, ақын және ағартушысы Абай Құнанбайұлының 180 жылдық мерейтойымен отандастарын құттықтады.
«Абай – әлемдік деңгейдегі тұлға, халқымыздың мәдениетінің дамуына және ұлттық сананың жаңғыруына өлшеусіз үлес қосқан ұлы ақын. Қазіргі қазақ әдебиетінің негізін қалаушы ретінде ол халқымыздың дүниетаным көкжиегін кеңейтті», – делінген Мемлекет басшысының мерейтойлық шараларға қатысушыларға жолдаған құттықтауында.
Президент атап өткендей, ақын жас буынды білімді, еңбексүйгіш әрі жауапкершілігі жоғары азамат болуға үндеді. «Оның ойлары бүгін де жаңа сапалы ұлт қалыптастыру ісіне қызмет етіп келеді, ал өмір жолы – Отанға деген сүйіспеншіліктің және қоғамға адал қызмет етудің айқын үлгісі», – деді Тоқаев.
Мемлекет басшысы Абайдың мол мұрасы тек қазақ халқына ғана емес, бүкіл адамзатқа рухани бағдар болғанын атап өтті. «Ақынның даналық ойлары мен өсиеттері ешқашан өзектілігін жоймайды. Сондықтан оның шығармашылығын терең зерттеп, кеңінен насихаттау аса маңызды», – деп түйіндеді Президент.
Еске сала кетсек, 2020 жылы Қасым-Жомарт Тоқаев 10 тамызды – Абай күні ретінде белгіледі. Биыл ұлы ақынның туған өлкесі – қазіргі Абай облысында мерейтойға орай салтанатты шаралар өтіп жатыр.
