KazTAG агенттігінің хабарлауынша, АҚШ-тың Оңтүстік Нью-Йорк округтік соты Алматы қаласы мен «БТА Банктің» азаматтық шағымы аясында Ильяс Храпуновты сотқа құрметсіздік танытты деп айыпталды. Қазақстан Республикасы Әділет министрлігінің ақпаратына сәйкес, 2025 жылғы 6 тамызда Нью-Йорктің Оңтүстік округі бойынша АҚШ округтік соты тараптардың дәлелдерін тыңдап, материалдарды зерделеу нәтижесінде сотқа құрметсіздік көрсеткені үшін Ильяс Храпунов кінәлі деп танып, Алматы қаласы мен «БТА Банк» АҚ-ның пайдасына шешім шығарылған. Сәрсенбі күні жарияланған хабарламада атап өтілгендей, бұған дейін шығарылған 221 285,31 АҚШ долларын өндіру туралы сот бұйрығына қосымша ретінде, федералды судья Джон Г. Келтл Ильяс Храпуновтың соттың нақты әрі міндетті түрде орындалуы тиіс талаптарын бұзғанын анықтады. Атап айтқанда, ол өз активтері туралы тұрақты есеп беруге міндеттеген сот шешімін орындамаған. Хабарламада, сотқа құрметсіздік көрсеткені үшін кінәлі деп танылғаннан кейін, Храпуновқа мұндай есептерді ұсыну міндеті жүктелгені атап өтіледі. Жаңа қаулы Ильяс Храпуновты өз активтері туралы толық мәліметті және оған қатысты шығарылған сот шешімдерін орындау үшін қаражат табуға бағытталған әрекеттері жөніндегі деректерді тұрақты түрде беруге міндеттейді; бұл талаптарды орындамағаны үшін қосымша қаржылық санкциялар көзделген. Сондай-ақ Ильяс Храпунов сотты құрметтемеу әрекетінің салдарынан Алматы қаласы мен «БТА Банкке» келтірілген шығынды өтеуі тиіс.
Евразия24 пікірі:
Алматының бұрынғы әкімі Виктор Храпуновтың ұлы Ильяс АҚШ-тағы сот қудалауына тартылған тұлғалар қатарында. Ол бірнеше мәрте сотқа құрметсіздік танытқаны үшін кінәлі деп танылып, өзіне жүктелген міндеттемелерді орындамаған. АҚШ сот жүйесі заң талаптарын елемегені үшін оған қосымша қаржылық санкциялар салынатынын ескертіп отыр. Бір жағынан алғанда, бұл жаңалықтың жағымды тұсы – Храпуновтар отбасының қылмыстық қудалаудан қашып шетелге кетуіне қарамастан, олардың артынан құқықтық талаптар шекара асып, қадағалау тоқтамағаны. Алайда енді не болады?Ильяс Храпунов АҚШ сотының шешімдерін орындап жатқан жоқ, әрі бұл жағдайдан айтарлықтай зардап шегіп отыр деуге де келмейді. Құқық жүйесінің мәні – жасалған әрекет үшін жазаның бұлтартпастығында.
Қазақстанда Ильяс пен Виктор Храпуновтарға қатысты үкім шығарылса, олар бірнеше жылға бас бостандығынан айырылып, ірі көлемде материалдық жауапкершілікке тартылар еді. Олар сот бақылауында болғанымен, шетелде емін-еркін жүр. Осындай жағдайда Алматы қаласына немесе бүгінде жойылып кеткен «БТА Банкке» қандай да бір өтемақы қайтарыла ма – өзіңіз пайымдай беріңіз.
