Астана. 11 қыркүйек. ИНТЕРФАКС-ҚАЗАҚСТАН – Қазақстан Президенті Қасым-Жомарт Тоқаев Экономиканы либерализациялау бағытында атқарылып жатқан жұмыстар жөнінде Бәсекелестікті қорғау және дамыту агенттігінің төрағасы Марат Омаровтың есебін тыңдады. Бұл туралы Мемлекет басшысының баспасөз қызметі хабарлады.
Омаровтың айтуынша, экономиканың мемлекеттік сектордағы үлесін азайту мақсатында Жекешелендіру жөніндегі ұлттық офиспен бірлесе отырып, мемлекеттік қатысуы бар 450-ден астам кәсіпорынды бәсекелестік ортаға беру ұсынылған тізім дайындалған.
Сондай-ақ агенттік төрағасы негізгі тауар нарықтарында бәсекелестікті дамыту бойынша атқарылған жұмыстар жөнінде мәлімет берді. Атап айтқанда, биржалық сауданың заңнама талаптарына және заманауи нарықтық жағдайларға сәйкестендірілгені айтылды.
«Қазіргі таңда елімізде нақты жұмыс істеп тұрған үш тауар биржасы ғана бар. Ал агенттікке осы салада мемлекеттік бақылау функциялары берілген кезеңде олардың саны 22 болған», – делінген баспасөз хабарламасында.
Кездесу барысында Президент Қасым-Жомарт Тоқаев бәсекелестікті негізгі экономикалық салаларда дамыту, агенттік жүргізіп жатқан тергеп-тексерулерді жалғастыру және шағын және орта бизнестің мүддесін қорғау мәселелері бойынша бірқатар тапсырма берді.
