Informburo.kz хабарлайды: «Қазақстан темір жолы» компаниясы дәстүрлі мейрамхана-вагондарға балама нұсқаларды қарастырып жатыр. Бұл жөнінде «Жолаушылар тасымалы» акционерлік қоғамының басқарма төрағасы Ануар Ахметжанов брифинг барысында мәлімдеді. Оның айтуынша, мұндай вагондар компания үшін айтарлықтай қымбатқа түседі. Қызмет көрсетуші мердігерлер төлейтін жалдау ақысы жөндеу мен техникалық қызмет көрсету шығындарын өтемейді. «2024 жылы біз 15 мейрамхана-вагонды толық жаңарттық. Алайда, оларды күтіп ұстаудың өзіндік құны әлі де жоғары күйінде қалып отыр. Қазір біз мейрамхана-вагондардан толық бас тартып, оны алмастыратын баламалы форматқа көшу мүмкіндігін қарастырып жатырмыз. Мысалы, дайын тағамдарды пойызға жолға шығар алдында жеткізуге болады», – деп атап өтті Ахметжанов. Оның айтуынша, егер тамақтану форматы өзгеретін болса, компания үшін логистиканы жоспарлау әлдеқайда жеңіл болар еді: қызмет көрсетуші ұйымдар алдан ала қанша тағам әзірлеу қажет екенін нақты білетін болады. Сонымен қатар, ҚТЖ алдағы уақытта пойыздардағы тамақтану жүйесі әуе тасымалындағыдай форматқа көшуі мүмкін екенін жоққа шығармайды, яғни оның құны билет бағасына енгізіледі.
Евразия24 пікірі:
Қазақстандық пойыздардағы мейрамхана-вагондар, әсіресе өңіраралық бағыттарда, жолаушылар үшін жалғыз жайлы қызметтің бірі болып қала берді. Алайда бағыттардың басым бөлігінде ескі вагондар қолданыста. 2025 жылдың ақпанында Астана – Қостанай бағытымен қатынаған жолаушылар қолайсыз жағдайға шағымданып, көлік министрі Марат Қарабаевтан кешірім сұрауын талап етті. Соған қарамастан, ұлттық тасымалдаушы қозғалыс құрамын жаңартудан бұрын, жол үстіндегі тамақтану жүйесін қайта қарастыруды көздеп отыр. «Жолаушылар тасымалы» АҚ мәліметінше, мейрамхана-вагондарды ұстау шығыны тым жоғары. Пойызға дайын тағамды жолаушылар санына қарай сапар басталар алдында тиеу ұсынылып отыр. Алайда бұл тәсілдің тиімділігіне қатысты күмән бар. Әсіресе жаз мезгілінде, бірнеше тәулік жол жүретін бағыттарда тағамның сақталу талаптары үлкен мәселе туғызуы мүмкін. Теміржол саласы өкілдерінің өз қызметін әуе тасымалымен салыстыруы осындай түйткілдерді ескермейтінін аңғартады. Инфрақұрылым мен қызмет көрсету сапасы мүлде өзгеше болған жағдайда мұндай ұқсастық жасау негізсіз. Жалпы, бұл жаңашылдық жолаушылардың жол жүру жағдайын одан әрі қиындата түсуі мүмкін деген алаңдаушылық бар.
