Мәскеу, 19 қыркүйек. ИНТЕРФАКС. Ұлыбритания 2023 жылғы тамызда 18 млрд фунт стерлингті (24,3 млрд АҚШ доллары) құрайтын бюджет тапшылығын тіркеді. Бұл туралы елдің Ұлттық статистика басқармасының (ONS) есебінде айтылған.
Аталған көрсеткіш өткен жылдың тамызымен салыстырғанда 3,5 млрд фунтқа артық және соңғы бес жыл ішіндегі ең жоғарғы айлық дефицит болып отыр.
Сарапшылар бұған дейін тапшылық 12,75 млрд фунт деңгейінде болады деп болжаған еді.
Ағымдағы қаржы жылының басынан, яғни сәуір мен тамыз аралығында Ұлыбритания бюджетінің жалпы тапшылығы 83,8 млрд фунтқа жетті. Бұл өткен жылдың сәйкес кезеңімен салыстырғанда 16,2 млрд фунтқа артық және 2020 жылдан бергі ең жоғары деңгей саналады.
Тамыз айында бюджеттің кірісі 4,8 млрд фунтқа артып, 93,2 млрд фунтты құрады. Ал шығыстар 8,4 млрд фунтқа өсіп, 111,1 млрд фунтқа жетті. Соның ішінде мемлекеттік қарыз бойынша пайыздық төлемдер 1,9 млрд фунтқа өсіп, 8,4 млрд фунтты құрады.
Тамыздың соңындағы есеп бойынша, Ұлыбританияның мемлекеттік қарызы (мемлекеттік банктердің қарызын қоспағанда) ЖІӨ-нің шамамен 96,4 пайызына тең болды. Бұл көрсеткіш 1960-жылдардың басынан бергі ең жоғары деңгейге жақын.
